GIBUTYAG ni Cagayan de Oro City Councilor Candy Darimbang nga iyang gilantaw nga magpapili sa taas nga posisyon sa umaabot nga piliay tuig 2016.

Apan gipasabot niini nga iya usa nga timbang-timbangon kung unsa gayud nga posisyon.

Gibutyag niini nga kung dili na mobalik pagpapili isip kongresista sa ikaduhang distrito si lawyer Rolando Uy, iyang gilantaw ang posisyon niini.

Apil sa gitinguhang daganan niini mao ang pagka bise-mayor dinhi sa dakbayan.

Hinuon, gipasabot ni Darimbang nga imposible usab nga mahitabo nga iyang ma-runningmate si Uy, kinsa gihungihong nga magpapili pagka mayor sa umaabot nga eleksyon apil usab si kanhi mayor Vicente Emano, kinsa gilaumang magpapili og balik.

Si Mayor Oscar Moreno, kinsa una na nga mikumpirma nga magpapili og balik pagkamayor sa dakbayan, ang wala pay runningmate sa eleksyon, hinungdan usa sa gilantaw si Darimbang hilabi na iya kining kapartido.

Gibutyag niini nga angayan pa kining panag-estoryahan ug buot sab niya masuta kung unsay pagbuot sa katawhan nga mahimo niyang posisyon.

Samtang sa iyang bahin ni Konsehal President Elipe, gibutyag niini nga preparado siya sa bisan unsa nga posisyon hilabi na nga katapusan na niyang termino sa konseho.

Daw mahimo siyang modagan isip bise mayor sa dakbayan ug kongresista sa ikaduhang distrito.

Apan giklaro niini nga mahibaloan kung unsa iyang daganan niini sa umaabot bulan sa Oktubre.

Gibutyag usab ni Elipe nga dili pa usab niya mabutyag kung siya ba ang mahimong runningmate ni kanhi mayor Emano, kinsa gidudahan magpapili og balik.

Daw tungod usab kay lumad ang iyang mga ginikanan nga taga probinsya sa Camiguin ug Surigao, mahimo usab nga didto siya magpapili sa dapit.