INIT nga bantayanan karong semanaha ang himuon sa mga kongresista sa ti­nguhang pagpasar sa Bangsamoro Basic Law (BBL). Karong Huwebes, Hunyo 11, ang target nga mapasar sa Kamara ang BBL.

Nasigingsiging ang mga kongresista gikan ni Presidente Noynoy Aquino nga nagbuot nga mapasar ang BBL sa dili pa mo-adjourn ang 16th Congress sa Hunyo 11. Sumala sa tinubdan nga ang BBL, ipasigarbo ni PNoy atol sa iyang ikaunom ug kataposan nga State of the Nation Address (SONA) karong Hulyo 27.

Dili lisod alang sa Kamara ang pagpasar sa BBL. Namatud-an kini sa dihang kalit lang nga milikoy ang 50 ka mga kongresista sa ad hoc committee nga gipangulohan ni Cagayan de Oro Congressman Rufus Rodriguez. Nagdahom ta pirmiro nga si Rodriguez supak sa BBL kay daghan siyang gikuwestyon nga mga probisyon sa mao nga balaudnon.

Yangayanga, mibotar si Rodriguez sa BBL. Unsa man kahay nakaimpluwensya ni Rodriguez?

Personal kahang nausab ang iyang baruganan sa BBL? Apil kaha siya sa nasilawan sa gikatahong P50 milyones nga proyekto ug P1 milyones nga kuwarta nga giingong gisuburno sa Malacañang? O, apil ba kaha siyang gihulga nga mapriso human karong bag-o naa­pil ang iyang pangalan sa pork barrel scam ni Janet Lim Napoles?

Sa habig sa Senado, dili pa nato masiguro kon unsa ka hugot ang baruganan sa mga Senador. Sa 24 ka mga Senador, atong nakita nga ang dayag nga supak sa BBL mao sila si Senador Bongbong Marcos, Chiz Escudero, Alan Peter Cayetano, Pia Cayetano ug Sen. Miriam Santiago. Ang klaro kaayong nabaligya na sa BBL mao si Senate President Franklin Drilon. Ang ubang mga Senador, maglisod pa ta og tagna kon unsay naa sa ilang huna-huna.

Kabahin sa revised nga provision sa BBL nga naaprobahan sa ad hoc committee nagkanayon: “A plebiscite for inclusion in the Bangsamoro area may be held in any local government unit or geographic area outside the jurisdiction of the Bangsamoro, but which are contiguous to any of the component units of the Bangsamoro and within the area of autonomy identified in the 1976 Tripoli agreement signed by the government with the Moro National Liberation Front (MNLF)”.

Kon atong lakturon og sabot, mahimong dunay plebisito nga himuon aron maapil sa lugar sa Bangsa­moro ngadto sa bisan unsa nga kagamhanang lokal nga gawas sa hurisdikyon sa

Bangsamoro. Kuwestyunable ang mao nga probisyon kay mahimo diay nga pinaagi sa plebisito, palapdan pa sa mga Moro Islamic Liberation Front (MILF) ang ilang teritoryo.

Peligro og sakupon ta og apil sa mga Moro.