DIHAY usa ka bata nga ginganlan og ‘Kenneth.’ Sa dihang nagdako siya, nakabantay nga wa gyuy bisan gamay na lang sa iyang nawong nga naliwat sa iyang amahan ug inahan.

Nagduda siya nga sinagop ra siya. Hangtod nga niabot ang panahon nga nakaangkon siya’g igong katakos ug kaisog sa pagpangutana sa iyang amahan ug inahan sa kamatuoran.

Diha niya masayri nga di siya tinuod nga anak sa iyang giila nga mga ginikanan.

Sinagop lang siya. Matod pa sa iyang inahan, “Mao bitaw nga ginganlan ka namog Kenneth, dong, kay kinit-an ra man ka.”

Mao kini karon si Senador Grace Poe. Giangkon ni Poe nga siya usa ka “foundling,” nga kinit-an lang siya. Gibilin lang siya sa atubangan sa usa ka simbahan sa Jaro, Iloilo,  ug gisagop sa mga bantugang artista sa pelikula nga sila si Fernando Poe Jr. ug Susan Roces.

***

Matod ni Senador Grace, nagpadayon ang iyang pagpangita sa iyang biological parents.

Apan iyang gipanghimakak nga usa siya ka illegitimate child kon anak sa gawas ni kanhi Presidente Ferdinand Marcos, ang amahan ni Senador Ferdinand Marcos Jr.

Matod pa niya, iya na nga gipangutana ang iyang adoptive mother nga si Susan Roces apan gihimakak usab niya ang maong mga huhungihong nga si Marcos nakapaanak sa igsuon ni Susan Roces nga si Rosemarie Sonora. Gimugna ang estorya, matod pa sa mga huhungihong, nga gibilin si Grace Poe sa usa ka simbahan sa Jaro, Iloilo, aron mahunong ang mga tabi-tabi.

Mao kana ang komedya nga nikatap nga di na kinahanglang modagan si Senador Bongbong Marcos sa pagkapresidente kon modagan si Senador Grace Poe sa pagkparesidente kay iya man kaha kining igsuon.

***

Apan nagyapayapa ang oposisyon pagkahibawo nga si Senador Grace Poe usa lamang ka kinit-an. Si JV Bautista, ang interim secretary general sa United Nationalist Alliance (UNA) ni Bise Presidente Jejomar Binay, nga una nang nideklarar nga modagan sa pagkapresidente, niingon nga mahimong babag sa pagdagan ni Poe pagkaresidente ang butang nga siya kinit-an lamang.

Matod pa ni Bautista, di matino kon siya usa ba ka “natural-born Filipino.” Apan si manlalaban Romulo Macalintal, usa ka batid sa balaod sa eleksyon, niingon nga si Poe pagailhon nga usa ka Filipino ug usa ka natural-born citizen ubos sa United Nations Convention on the Reduction of Statelessness.

Sumala sab ni Bautista, ang Pilipinas wa kapirma sa maong UN convention, busa way epekto kini sa Pilipinas.