LAING unang adlaw sa semana nga gipaabot nga dunay dugang paghuot sa trapiko sa Metro Cebu tungod sa pormal na nga pag-abli karon sa klase sa mga pribadong tunghaang elementarya ug sa tibuok nasod.

Pun-an pa sa masinati matag-karon-ug-unya nga brownout nga makaapekto sa traffic lights, ang wala pa mahuman sa pag-ayo sa pipila ka mga nag-unang kadalanan ug ang pagsugod na sa panahon sa ting-uwan.

Kahimtang kini nga dili nato malikayan karong adlawa dinhi sa dakbayan nga nagkadako og popula­s­yon. Aron walay mahitabo nga panaglalis tali sa isig ka dray­ber, pasahero ug traffic enforcers, maayong pagbalon kita og taas nga pasensya ug kinahanglan nga magsayo kaysa naandan ang mga sumasakay aron dili ma-late sa klase o trabahoan.

Hinuon, nasayod kita ang mga hingtungdan nga ahensya sa kagamhanan, sama sa Land Transportom, Cebu Integrated Traffic Office Management (Citom) sa dakbayan sa Sugbo ug ubang lokal nga kagamhanan sa Metro Cebu, nangandam na sa pagpaka­tap sa traffic enforcers sa paggiya sa dagan ug kahan-ay sa trapiko. Hinaut unta nga sila malampuson sa ilang serbisyo.

Apan ang pagsulbad sa kahuot sa trapiko dili lang tahas sa traffic enforcers o ahente sa kagamhanan apan kaakohan natong tanan, bisan sa ginag­may nga pamaagi, sama pananglitan, dili una magdala sa pribadong sakyanan ug mosakay sa publikong transportasyon aron makibhangan ang kahuot sa dalan.

Ang mabuot nga lungsoranon magpakabana ug moabag sa kasulbaran sa mga nag-unang problema sa komunidad. Samtang, magbalon kita karon og taas nga pasensya sa pagsubay sa kadalanan.