DIGOS CITY -- Giangkon ni Mayor Joseph Peñas nga nasubo siya human masayod nga wa na mahaom sa ilang programa ang mga komentarista sa dakbayan.

Inay nga mga balita ug komentaryo ang madunggan sa mga mamahayag sa pipila ka mga istasyon sa dakbayan, nagpulihanay na og atakihay ang mga magsisibya nga adunay personal nga bangi gamit ang ilang mga istasyon.

Aminado si Peñas nga nalambigit sab niini ang pipila ka mamahayag nga naghupot og programang binayran sa dakbayan.

Gumikan niini, giputol sa lokal nga gobyerno ang mga kontrata sa pipila ka istasyon.

Apan, padayon gihapon nga nag-atakihay ang mga iladong magsisibya nga daw wa na magsubay sa code of ethics sa natad sa gawasnong pamahayag.

Wa sab kini tagda sa Kapisanan ng mga Brodkaster sa Pilipinas hinungdan nga nagpadayon ang ilang mga programa. (Orlando Dinoy)