GILIMOD ni Mayor Rodrigo Duterte ang taho nga si Batangas Governor Vilma Santos-Recto maoy iyang runningmate sa umaabot nga 2016 nga eleksyon.
Si Duterte, sa iyang programang "Gikan sa Masa, Para sa Masa" kagahapon, Hunyo 7, nagsulti nga ang balita labot niya nga modagan pagka-presidente uban ni Vilma Santos isip bise-presidente di tinuod.
"False. Dili man ko modagan pagka-presidente, so walay panahon nga modagan siya, unless she runs for another ticket, under somebody but definitely it's not me," sulti ni Duterte.
Ang balita migawas human sa ilang kulokabildo ni kanhi Cotabato governor Manny Piñol atol sa ilang biyahe paingon sa siyudad sa Davao gikan Antique City.
Si Piñol giingon nga nangutana kang Duterte nga nagkanayon nga si Vilma Santos maoy maayong pilion.
Kini nga pahayag gilimod ni Duterte sa iyang programa sa telebisyon kagahapon.
"Kana si Vilma Santos, I have not seen her for the last 20 years. I have not talked to her neither I would invite her to be a runningmate because I am not running -- I am just walking," pahayag ni Duterte.
Siya usab nagsulti nga wa niya gipasabot nga kadtong mga pangalan maoy iyang linyada sa politika.
"No, it was a flight; we're going back to Davao. Akong katapad si Governor Piñol. Governor Piñol is a political writer. He was a political writer of President Ramos before. He is a commentator sa boxing. Ingon siya dream team. Kining si Vilma Santos wala na niya panganli but ingon siya: 'Kinsa imong pilion kon ikaw ang mopili?' And I started to rattle off names nga tan-aw nako would give justice to the department, would head ug lead kung naa sila diha," sulti ni Duterte.
Ang mayor miangkon nga ang advertisement gibayran sa iyang mga dumadapig ug iya na silang giingnan nga di siya modagan.
"Kanang akong advertisements mogawas 10 times daw halos, mahal kaayo na. Somebody is spending for it and I do not want to ask who kay basig maingnan lang pod nako nag-una-una ka man, you must need to talk to me first, respeto ba...?" sulti ni Duterte.
Giingon niya nga daghan ang iyang gisuspetsahan nga mga milyonaryo nga taga Davao nga maoy nagbayad sa iyang political advertisement.
Si Duterte milimod usab sa balita nga ang posible niyang campaign manager mao si Robin Padilla, kinsa giingon niya nga suod lamang nga higala ang aktor.
Bisan daghan na kaayo siya og dumadapig, si Duterte nagpabiling lig-on sa baruganan nga di modagan sa pagka-presidente karong 2016 nga eleksyon.