ORMOC CITY - Giangkon sa hepe sa Police Station (PS) 3 ning dakbayan nga naglisud sila sa ilang imbestigasyon sa pagpamusil sa Bay View Inn niadtong milabayng semana.

Si P/SInsp. Maturino Diaz Jr., hepe sa PS3, niingon nga usa sa ilang nalisdan kay di ma klaro ang dagway sa duha ka responsabli tungod sa hanap nga closed circuit television (CCTV) camera.

Pulos di taga Ormoc ang duha ka biktima.

Ang nakalas nga si Claudio Borikoy, taga Samar, samtang ang kapuyo niini nga samdan ug naluwas nga si Janice Tampos kay molupyo sa Opao, Mandaue City, Cebu.

Sumala ni Diaz nga maglisod sila sa pagkuha og dugang impormasyon kay wala kini mga par­yente ning dakbayan.

Bisan niini, gisaad ni Diaz nga di sila mohunong sa pag-imbestigar sa insidente.

Ipatawag sa kapulisan ang tag-iya sa establisemento gumikan sa ilang nakitang ‘security lapses’ niini.

Si Carlo Tan, apo sa tag-iya, niingon nga alas 6:00 gabii hangtod alas 6:00 sa buntag ra ang ilang gwardiya.

Ang krimen nahitabo alas 4:25 sa hapon.

Andam motabang sa im­bestigasyon ang nagdumala sa establismento. (JKDP)