Negros Oriental, Negros Occiental usa na ka rehiyon

DUMAGUETE CITY - Gipirmahan na ni Pres. Benigno Aquino III ang Executive Order (EO) 183 sa wa pa kini milarga paingon sa Japan alang sa usa ka state visit niadtong miaging semana.

Ang pagpirma sa EO183 nag­latid sa pag-usa sa duha ka Probinsiya sa Negros ngadto sa Negros Island Region (NIR).

Gipasalamatan og dako ni Sec. Manuel Roxas silang Gob. Roel Degamo sa Negros Oriental ug Gob. Alfredo Maranon sa Negros Occidental.

Ang duha ka amahan sa isla sa Negros maoy naningkamot nga matuman ang dugay nang gidamgo sa duha ka probinsiya nga mamahimong usa ka rehiyon.

Ang Negros Oriental kasamta­ngan nahisakop sa rehiyon 7 diin gikauban niini ang mga probinsiya sa Cebu, Bohol ug Siquijor samtang ang Negros Occidental atua usab nasakop sa rehiyon 6 kauban ang mga lalawigan sa Iloilo, Guimaras, Aklan ug Antique.

Gibutyag ni Roxas nga dako og natabang sa pagdapit niya kang Aquino sa pagbisita sa Negros ug gikahimamat niya ang duha ka gobernador aron tukion ang kalamboan sa plano.

Si Degamo wa una dayon nagpadala sa iyang mga kritiko nga mouyon sa plano apan mipatigbabaw ang iyang desisyon nga di dali-dalion ug kinahanglan kinig dakong pagtuon alang sa interes sa katawhan sa duha ka probinsiya.

Kining plano sumala pa milungtad na og 20 ka tuig una pa kini natuman sa hingpit ug karon natuman na ang damgo sa katawhan sa isla sa Negros.

Gikauyonan usab sa pagbahinay sa pundo nga 60-40 diin 40 porsiyento sa lalawigan sa Negros Oriental ug 60 porsiyento sa Neg­ros Occidental tungod sa dako ang ilang populasyon.

Si Pnoy gikataho nga moadto sa lalawigan sa Iloilo karong Hun­yo 12 aron sa pagtambong sa pagsaulog sa Independence Day ug ilang giimbitar si Degamo aron pagtuki sa mga rehiyonal nga mga opisina ug mga rekisitos ingon man road mapping aron hingpit nang maimplementar ang plano.

“I know that you have not fully benefited from certain meaningful services, because you had to share funds and resources with other regions. I consulted you, and I learned of your desire to have equal and direct representation as one region. This desire is exactly what the formation of the Negros Island Region fulfills,” tipik sa pamahayag ni Roxas. (LEJ)