SA pagpalabang sa Ubos Bay Balauranan sa balaudnon nga magpabalik sa silot kamatayon, opisyal sa simbahang Katoliko nangutana sa mga magbabalaod kon andam na ba ang Pilipinas nga mopahamtang sa death penalty sa kasamtangan nga sistema sa hustisya sa nasod nga sagad pabor ngadto sa mga adunahan.
Si Msgr. Joseph Tan, tigpamaba sa artsidyosesis sa Sugbo, namahayag kon ipatuman na sa hingpit ang death penalty sa nasod angay seguraduon sa gobiyerno nga mahatagan og patas nga pagtagad ug hustisya ang mga kabos ug dili kay ang mga inosente ang maalaot tungod nga way ikasarang sa pagbayad og kalibre nga mga manlalaban.
Matod niya sa kasamtangan ang simbahan wa mouyon sa pagpabalik sa silot kamatayon apan mahimo kini makonsiderar sa paghatag og hustisya sa mga biktima labi na sa mga niluog nga krimen.
“It is not absolutely immoral, it can be used as ethical measures against heinous crimes,” dugang ni Tan.
Siya namahayag angay mohimo og mga lakang ang gobiyerno nga maseguro ang paspas ug makiangayon nga hustisya sa mga biktima ug dili kay paspasan ang pagpahamtang og silot kamatayon diin ang mga inosente na hinuon ang masilotan ug dili ang tinuoray nga nagbuhat.
“If mao na, we subscribe nga nagdalidali ta, it could bring more harm than good,” dugang pahayag ni Tan.
Si Msgr. Esteban Binghay, episcopal vicar sa artsidyosesis sa Sugbo, unang nipadayag nga kon aprobahan sa Senado ang balaudnon nga death penalty, angay nga iapil ang plunder nga maoy nakapapobre sa nasod.