MATA ug biyahe og sayo kon di ka ganahan ma-late sa klase ug trabaho, tambag kini sa opisyal sa Cebu City Traffic Operations Management (Citom) sa publiko.

Karong adlawa magsugod na ang klase sa mga pribadong tunghaan sa elementarya ug sekondarya sa dakbayan sa Sugbo ug gipaabot masinati sa mga motorista ang kahuot sa dagan sa trapiko ilabi na sa mga dalan nga nagpundok ang mga tunghaan.

Si Jonathan Joy Tumulak, operations chief sa Citom, niawhag sa mga estudyante ug trabahante nga mas maayo alas 6:00 pa lang sa buntag mogikan na sa balay aron malikay sa pagdagsa sa mga sumasakay ug paghuot sa mga sakyanan.

Matod niya 80 ka mga traffic personnel ang ilang ipakatap sa buntag ug laing 80 sa hapon nga maoy mopatunhay sa kahusay sa dagan sa trapiko sa kadalanan sa siyudad.

Mga lugar diin nagtapok ang mga eskwelahan ang hatagan og prayoridad ug bantayan sa mga sakop sa Citom.

Apil na niini ang mga dan P. del Rosario, Colon, Banilad ug Talamban areas sa dakbayan sa Sugbo.

“Mas maayo alas 6:00 pa lang sa buntag pullout nato sa balay. Di ta magpaabot sa oras tingtrabaho nga sakay na ug daghan nang mga tawo ang mag-atang og mga sakyanan,” tambag ni Tumulak dihang nahinabi sa Sun.Star Superbalita kagahapon.

Siya niingon nga way sakop nila ang gitugtan nga maka-dayoff o maka-leave karong adlawa pagseguro nga di sila magkuwang sa mga tawo nga momando sa trapiko.

Alas 6:00 pa lang sa buntag, magbantay na sa trapik ilabi na kon dunay mapalyar nga traffic lights ang ilang mga inspector, supervisor ug maintenance personnel.

Aron maminosan ang kahuot sa trapiko, limitahan sa Citom ang pagparada sa mga sakyanan sa mga pribadong eskwelahan diin ang ilang mga sakop ang mopahapsay.

Si Tumulak nagkanayon giseguro nila nga nag-andar ang pedestrian lights o ang suga nga mag-signal sa mga tawo nga motabok sa karsada nga dunay traffic lights.

Siya niawhag usab nga sa di pa mobiyahe, mas maayo nga susihon sa mga tag-iya kon wa bay problema ang ilang mga sakyanan aron dili maaberya ug makamugna og kahuot sa trapiko.

Samtang, andam na ang Land Transportation Office (LTO) 7 nga moabag sa nagkadaiyang lokal nga kagamhanan ingon man ang mga Oplan Balik Eskwela niini karon nga moabli na usab ang pipila ka mga pribado nga tunghaan sa elementarya, highschool ug kolehiyo.

Matod ni LTO 7 regional Director Arnel Tancinco nga gi-train nila pagbalik ang ilang enforcers aron i-adopt ang multi-tasking enforcement karon nga ubay-ubay na usab ang magdagan nga sakyanan sa kadalanan.

Dugang niini nga mas focus sila sa pagdakop sa molapas sa balaod ingon man nga nakigtambayayong na usab sila sa lokal aron mas hingpit nga mapatuman ang balaod.