GIAWHAG sa opisyal sa Commission on Election (Comelec) ang mga nag-edad og 18 anyos panahon sa eleksyon sunod tuig sa pagparehistro og sayo bisan kon gilugwayan ang pagpangrehistro kutob Oktubre 31 ning tuiga.
Kini subay sa Comelec Resolution No. 9853 aron mahatagan og higayon ang mga first time voter nga makasalmot sa presidential ug local elections.
Gawas sa new registration, gidasig usab ni Atty. Marchel Sarno, election officer sa Cebu City north district, ang mga registered voter kinsa wa makuhaig biometrics, lakip na ang pagbalhin og registration sa pag-adto sa ilang buhatan aron sila makabuto atol sa piniliay.
Ang Comelec moatiman usab sa problema sa mga botante kinsa napapas sa opisyal nga listahan sa botante sa pag-reactivate sa ilang record gumikan sa kapakyas pagbuto sa duha ka sunodsunod nga national election.
Dugang ni Sarno nga panahon na usab kini sa pag-usab sa record sa mga botante kansang mga spelling sa ilang pangalan ug ubang sayop sa pag-usab aron mahusto.
Sa kasamtangan, ang Cebu City adunay 578,703 ka aktibong botante diin 307,341 ang nagpuyo sa south district ug 271,362 ang nagikan sa north district nga maoy naglangkob sa 80 ka barangay.
Dugang ni Sarno nga padayon ang ilang offsite registration ngadto sa mga barangay aron mapaspasan ang pagrehistro sa botante.
Ang Comelec andam na sa ilang obligasyon sa umaabot nga piniliay ma-manual man o automated ang eleksyon.
Abli ang ilang buhatan gikan alas 8:00 sa buntag hangtod alas 5:00 sa hapon gikan sa Lunes hangtod sa Biyernes.
Ang Comelec gusto nga di na masubli ang problema nga ilang masinati panahon sa rehistrasyon nga adto na magdasok ang magparehistro kon hapit na mapupos ang adlaw sa rehistrasyon.
Sa samang kalamboan, gitinguha sa Comelec nga masulbad na ang tanang election protest nga gisang-at sa ilang buhatan niadtong 2013 sa di pa usab maabot ang 2016 elections.
Si Comelec Commissioner Louie Tito Guia, kinsa niduaw sa Sugbo niadtong Biyernes, niingon nga magtigom unya ang mga sakop sa Comelec en banc aron hisgutan ang ilang timeline sa pagsulbad sa mga gisang-at nga mga protest sa miaging eleksiyon.
Dinhi sa Sugbo, lakip sa mga election protest nga wala pa madesisyoni sa Comelec ang giduso nilang kanhi Cebu City Mayor Tomas Osmeña ug kanhi Bise Mayor Joy Young batok nilang Mayor Michael Rama ug Bise Mayor Edgardo Labella.
Giangkon ni Guia nga padayong gibalanse sa Comelec sa ilang tahas pagpangandam alang sa eleksiyon 2016 ug ang ilang pagka-huwes sa mga giduso usab nga election protest.