GIPOSASAN ang inahan human nadakpan sa entrapment operation sud sa panimalay sa kanhi konsehal sa lungsod kinsa nangayog abag sa kapulisan human gihulgang patyon niadtong Sabado sa alas 9:00 sa gabii sa Barangay Poblacion, lungsod sa Alcoy.

Si Delia Ambrad, 40, dunay ka­puyo, taga Barangay Balud, lungsod sa Dalaguete, giposasan human midawat sa P30,000 nga budol money samtang ang kapuyo nga si Alex Villahermosa gipangita sa kapulisan.

Ang mastermind usa ka Brian Ra­bago, hingkod ang panuigon nailang drug pusher sa Alcoy, kinsa nabalhog karon sa Cebu Provincial Detention and Rehabilitation Center (CPDRC).

Si kanhi Municipal Councilor Ailee Costin, 39, buwag sa bana, nagpuyo sa Barangay Poblacion, Alcoy, consultant ni 2nd district Cong. Wilfredo Caminero, nangaayog abag sa kapulisan niadtong Sabado sa alas 3:00 sa hapon.

Si PO2 Adorberto Carba sa Alcoy Police Station nga nahinabi sa dySS/Super Radyo/Sun.Star Superbalita nagkanayon nga si Costin, mitug-an nga Hunyo 3, nagsugod ang pagpanghulga.

Matod niini nga nagka-communicate sila ni Rabago pinaagi sa Facebook bisan kon naa kini sa sud sa CPDRC hangtod nga niabot ang punto nga gihulga siya niini.

Gihulga siyang patyon pinaagi sa text apan kon mohatag siyag P30,000 di nila idayon ang pagpatay kaniya hinungdan nga nabalaka siya niini.

Si Rabago mipahibawo kaniya pinaagi sa text nga dunay usa ka Delia Ambrad maoy mokuha sa kwarta diin anhaon lang siya diha sa ilang panimalay sa Poblacion, Alcoy.

Human nadawat sa kapulisan ang impormasyon wa sila maglangay mihimog aksyon migamit silag budol money gibutang sa white envelop diin gipababwan og P500.

Si Ambrad gikatahong naabot misud sa panimalay dihang gidawat niini ang envelop dali siyang giposasan sa kapulisan pero ang iyang kapuyo nga si Villahermosa nakasibat sakay sa motorsiklo.

Si Carba nagkanayon nga kasong extortion ingon man kasong grave threats ang ilang giandam nga ipasaka batok sa mga suspek.

Si Delia nibutyag nga wa siyay kalibutan kay gisugo lang sila ni Rabago nga ipakuha ang kwarta sa panimalay ni Costin.

Apan nagduda sila nga posibling nakahibawo ang kapuyo niini nga si Villahermosa, kinsa wa mopatim-aw hangtod ning pagsuwat ingon man misibat human gidakop si Delia niadtong Sabado sa gabii.

Hinuon duna silay nakuhang mga kumunikasyon sa selpon gikan kang Rabago ngadto kang Delia ingon man ngadto sa biktimang si Costin.

Si Costin nakaserbisyo na kinig tulo ka termino isip konsehal sa lungsod.