BATA patay human naigo og kilat samtang nagbantay sa ilang anay nga baboy nga nanganak atol sa pagbundak sa uwan niadtong Sabado sa alas 3:00 sa hapon sa Barangay General Climaco, dakbayan sa Toledo.

Si Francheska Rain Olinares Etorpe, 12, gideklarar nga dead-on-arrival (DOA) dihang nadangat sa tambalanan sa dakbayan sa Toledo human maayong pagkasunog ang iyang bukobuko ug nilagom ang lawas.

Samtang patay sab dihadiha ang anay nga baboy ug usa ka baktin nga naigo sab sa kilat.

Si PO2 Jeffrey Caburnay, sakop sa Alert Team sa Toledo Police Office Station, nga nahinabi sa dySS ug Sun.Star Superbalita nagkanayon nga ang apuhan sa biktima ug ginikanan didto sa alad sa baboy.

Gibantayan nila kay bag-uhay lang kining nanganak samtang nagsige'g bunok ang uwan uban sa kilat ug dugdog niadtong Sabado sa hapon.

Ang bata gikatahong naglingkod diha sa duol sa anay nga baboy nga nagpatutoy sa mga baktin dihang kalit nga dunay usa ka kusog nga liti o kilat miigo sa iyang bukobuko.

Tungod sa ka kusog sa kilat, nasunog ang iyang sinina sa likod diin maayong pagkapaso unya walay gigawasan sa kuryente sa iyang lawas hinungdan nga diretso sa paglagom.

Samtang ang anay ug ang usa ka baktin nga diha sa tupad sa biktima wa sab makalikay naigo sab sa kilat hinungdan nga patay dihadiha.

Ang bata gidali sa pagdala sa iyang ginikanan ug apuhan sa tambalanan apan DOA na kini ug wa matabang kay nasentro siya sa kusog nga kilat.

“Lingkod raman daw ni intawong bata siyempre kay bag-ong nanganak ang anay, gibantayan nila wa damha nga mitugpa ang kilat sa iyang bukobuko,” dugang ni Caburnay.

Si Caburnay niingon nga pwerting kusoga sa mga kilat ug dugdog niadtong Sabado diha sa ilang lugar dungan sa pagbundak sa uwan.

Apan ang pamilya sa biktima wa magdahom nga kadto nalang diay ang katapusan nilang pag-estorya sa bata diin didto pa miagi ang kilat sa alad sa baboy.

Gipadayag niini nga elevated nga lugar sab ang nahimutangan sa alad sa baboy hinungdan nga dili layo ang posibilidad nga kon mag-uwan-uwan ug magkilat delikado kaayo kini.

Sa miaging tuig, sa silingang barangay sa naasoy nga dapit, dunay usa ka inahan ang namatay sab kay naigo sa kusog kaayong kilat samtang nanglaba gawas sa ilang panimalay.