HUMAN sa malampuson nilang summer clinic, ang Yaw-Yan Ardigma Martial Arts Federation, Inc. mosugod sa ilang training module karong adlawa sa Yaw-Yan Headquarters nga nahimutang sa 4th floor sa Coast Pacific Downtown Center atbang sa University of Cebu (UC)-main campus sa dakan Sanciangko ning dakbayan.

Ang training program, nga molanat og unom ka mga buwan, abli alang sa mga bata ug hamtong nga interesadong magkat-on og martial arts.

Adunay saktong espasiyo ug komportableng lugar ang Yaw-Yan alang sa training camp niini.

Ang Yaw-Yan usa ka lumad nga martial arts sa mga Pinoy ug gikan kini sa duha ka mga pulong nga “Sayaw ng Kamatayan.”

Ang nagdiskubre niini mao si Grandmaster Napoleon “Nap” A. Fernandez ug iya kining gipaila sa publiko niadtong 1972 sa Sta. Cruz, Manila.

Nagkadaiyang parti sa lawas sama sa kumo, tuhod, siko, ug uban pa ang nagsilbeng hinagiban sa Yaw-Yan.

Nagkanayon si Yaw-Yan ArDigma Cebu CEO/Founder ug Vis-Min director Master Benigno “Ekin” R. Caniga Jr. nga itudlo sa training program ang saktong mga taktika sa stand-up ug ground fights.

Ang ubang mga makat-unan sa training program mao ang arnis, boxing fitness, Yaw-Yan combat self-defense, Yaw-Yan ArDigma system, grappling ug mixed martial arts (MMA).

Asoy ni Master Ekin nga nagpadayon pa ang enrollment alang sa training camp.

Alang sa dugang mga impormasyon, mahimong motawag sa 0943-3084772 o log-on sa www.yaw-yanardigma.com.