ILIGAN CITY - Upat ka mga barangay sa Tubod, Lanao del Norte ang nakasinati sa taga-hawak nga baha niadtong Marso 9 tungod sa walay hunong nga pag-ulan.
Matud ni Tubod Disaster Risk Reduction and Management Office Head Vic Mar Paloma nga kini ang mga barangay sa Tagueguiron, Bolod, Pigcarangan ug Poblacion.
“Nag-overflow ang mga creek ug mga canal kay on-going paman gud ang construction sa among sewerage system. Pero maayo nalang kay low tide, bisan miabot na sa critical level ang tubig sa Bolod River, wala rami nabutang sa ka-delikado,” miingon si Paloma.
Duna usab pag-landslide sa highway sa Tangueguiron nga nakaapekto sa trapiko sulod sa pipila ka minuto.
Tungod sa maong pagbaha, 250 ka mga indibiduwal gikan sa Poblacion ug 200 gikan sa Pigcarangan ang ilang gipabakwit ngadto sa mga luwas nga multi-purpose gymnasium.
Si Mayor Leoncio Bagul ang diretso'ng mideklara og suspensiyon sa klase sa tanang level sa mga tunghaan lakip na trabaho sa tanang buhatan ug ahensiya.
Sa lungsod sa Maigo, ang tunghaan sa elementarya sa barangay ug Purok 5 sa Barangay Labuay nalunopan usab og taga-liog nga tubig baha apan walay gikataho nga mga nagbakwit.
“As of 2 p.m., the national highway of Tubod area is passable. Flooded area at Barangay Poblacion and Barangay Pigcarangan already subside,” pagkumpirma ni Tubod Municipal Police Station Chief Javier Tanog.