SEGURIDAD maoy unang ikonsiderar kon motambong ba o di ang niangkong Central Visayas drug lord Franz Sabalones sa iyang pagsupak sa freeze order sa iyang mga kabtangan nga giluwatan sa Court of Appeals.
Sa usa ka phone interview sa Sun.Star Cebu kagahapon, ang abogado ni Sabalones nga si Louie Arma niingon nga mopasaka sila og ex-parte motion sa paglibkas sa freeze order nga giluwatan sa appeals court batok sa iyang mga kabtangan nga balor og P76 million.
Si Arma niingon nga naghuwat pa sila sa official copy sa freeze order gikan sa CA.
Human niini, siya niingon nga ilang ilhon kon unsa nga mga propiedad ang ginganlan sa freeze order nga gipanag-iya gyud ni Sabalones.
Sa mando niini niadtong Enero 19, ang the appeals court 8th Division nipugong sa P76 milyunes nga asset ni Sabalones sud sa unom ka mga buwan.
Ang pagpugong giluwatan human ang Philippine Drug Enforcement Agency - 7 ni-petition sa Anti-Money Laundering Council (AMLC) sa pagpugong sa mga kabtangan niini.