HINAY-HINAY lang. Gani, bisan ang buta mahiabot ra gihapon sa padulngan basta ang iyang sungkod subay lang sa pinahiluna nga lakang. Wala’y paglapas sa pamaaging tarong. Duna’y tumong.
Tuyo nga layo unta’g maabtan. Sanglit sulondon baya ang gipasiugdahan sa Cebu Road Heroes (CRH)— ang pagtabang sa mga tigmaniho’g sakyanan aron mopahiuyon sila sa mga lagda diha sa kadalanan— kining tinguhaunta matuman. Kay kon dili, ay, padayon na lang ini sa pagpangutkot ug pag-unay og hampak sa atong agtang. Alaot gyod ta kon wa’y kahigayonan lahos sa kausaban, kon pabilin tang maungot sa naandang mga labad: mga katalagman tungod sa pagkayam-angan ug kalangay gumikan sa kahagip-ot sa mga agianan.
Tungasonon tuod intawon ang pangagpas sa CHR nga makat-on unta ang mga drivers og disiplina sa ilang kaugalingon. Dili magpatuyang og dali-dali pinaagi sa wa-diri-wa-didto nga taras, sama sa makakurat nilang paturagas sa higayon nga sila mapangahason sa pag-counterflow diha sa kadalanan diin ang ilang pagpasutoy sayop kun sukwahi sa sulog sa trapiko. Sigon sa gibutyag sa pamuno sa CHR, angay gyod nga sayawon ug pahibal-on ang mga danghag nga drivers “unsa ila sayop.” Unta makat-on sila pagmatngon, ug mosunod na gyod sa mga sumbanan alang sa biyaheng hapsay. Makunhod gyod unta ang hagbay rang traffic problem sa dakbayan, labi na kon mahimo na silang hanas diha sa mga kinasang-an, kanang mga dapit nga duna’y “intersections.” Niining paagiha, gikinahanglan gyod ang mabuligon nga pag-uyon ug pagtuman sa gitudlo nga panglantaw saCebu City Transportation Office (CCTO) aron mahalikay sa gabalik-balik nga kabilinggan.
Babag gyod baya sa atong gipaabot nga katilingbanong kaayohan ang pakyas natong pagsunod kon unsa’y angay. Diin ang mga paaging simang sa mga buloyagon mao’y gapatuyang, dili kahibulongan kon daghan tang hapit na mapul-an og hinuwat sa kahingpitan anang gipangandoy natong kauswagan. Ay, unsaon nato pag-aginod lahos sa atong nasudnong paglambo kon ang kasamok sa atong kadalanan gapadayag lang sa atong buta-bungol nga pagpabuyag? Pastilan, kining di-kasaligan nga padagan— ug kini maaninaw pod baya nato sa kahiwian sa atong mga sinaligan nga kuwang og dukol— gadugang gyod baya intawon sa atong pag-antos. Labaw sa mga gatapun-og ug gapasad nga mga basura diha sa kadalanan (nga kanunay lang pod hamokon sa hinanaling lunop atol sa ting-ulan) mao ang pag-usik-usik nato sa kahigayonan nga makalabang ug makalusot na gyod unta sa atong hagip-ot nga kahimtang. Apan dili pa baya ulahi ang tanan bisan gakamang ang kadaghanan. Mahimo pa ang pagbangon.
Padayon lang ta gihapon. Ug molahutay ra ta, labi na’g palugwayan pa nato ang paninguha ug pagbantay nga ang atong mga lihok motakdo unsa’y tarong ug angay.
(geemyko@gmail.com)