MGA biktima nga nakakuha og peke nga lisensya sa pagmaneho gidasig nga mopatim-aw sa buhatan sa Land Transportation Office (LTO) aron i-report ang ilegal nga binuhatan sa mga fixer.
Kini maoy giawhag ni Traffic Enforcement Agency of Mandaue (TEAM) head Glenn Antigua sa publiko sa dihang nahinabi sa Superbalita Cebu.
Matod ni Antigua nga sa milabayng buwan, siyam ka mga drayber nga nasikop sa TEAM ang naghupot og peke nga lisensya.
“Actually atong gipangutana ang mga gipangdakop nato, ang ilang istorya is paghuman nila og kuha sa ilang mga student permit, iggawas nila sa LTO Region office , naa kunoy mosugat nila nga fixer nga pasaligan sila nga iplastik dayon ilang license,” butyag ni Antigua ning mantalaan.
Dugang ni Antigua nga iya na gitaho sa regional direktor sa LTO ang problema.
“Ang problema lang sad sa LTO tungod sa kadaghan ug fixers kuno, daghang tawo sa gawas, maglisod silag identify kung kinsay mga tawhana,” matod ni Antigua.
Paambit niya nga ang pabayad sa mga fixer base sa mga gisaysay sa ilang nadakpan naggikan sa P4,500 ngadto sa P5,000 matag lisensya.
“Ang uban gipangayuan og P4,500 ang uban P5,000, di magkapareha. Gusto gyud dayon nga maka-drive dayon, ni-grab pud sa opportunity. Wa sila naghuna-huna nga fake pud ilang nakuha,” dason niini.
Gawas sa fixer, si Antigua nagkanayon niadto nga ilang gitino nga usa sa mga tinubdan sa mga peke nga lisensya kadtong mga snatcher sa may highway nga manguha sa pitaka sa drayber o usa ka tawo, diin kun may lisensya ang sud sa pitaka, papason lang ang nawong niini.