Dear Noy Kulas,
Please tagoa lang ko sa ngan nga Jenny, minyo ug dunay duha ka mga anak. Kining akong problema kabahin ni sa among pagpuyo sa akong bana nga wa untay bisyo, gawas lang sa babaye kay mawagtang lang ko sa iyang panan-aw, feeling na niya nga ulitawo siya.
Kanunay mi mag away sa akong bana tungod sa iyang pamilya nga nawong og kuwarta. Mag-away mi sa budget tungod kay ang iyang pamilya apil gihapon sa iyang budget nga makaigo sa amoang financial needs. Bisan tuod og arang arang mi og trabaho, apan naa miy mga anak nga nagkinahanglan og igong suporta namong parents, Noy.
Bisan unsaon pa nako ang akong bana, bahala na kuno og magkabuwag mi sulti niya nako.
Unsa may akong buhaton aron mabadlong ni siya. Maayo unta kon siya ra ang anak sa iyang parents, naa may uban pa. Unsa may imong ikasulti?
JENNY
Jen,
Bitaw, naa gyuy pamilya nga ingon niana kagrabe mopilit sa kwarta, nga moabot hangtod sa kaminyuon ang paghigot sa ilang sakop. Di nila isipon nga sakop sa pamilya ang di makatampo og kuwarta. Common ning problema nimo sa mga overseas Filipinos workers. Maora sab diay mo og OFW sa imong bana.
Kanang imong bana di na siya ganahan nga masilo kaniya ang iyang pamilya mao nga modugo na siya basta iyang mga igsuon ug ginikanan ang mangayo. Unta, nakakita sila nga ang imong bana minyo na, busa ang prayoridad di na sila kon di ikaw na ug ang inyong mga anak.
Okay ra nang motabang sa kutob lang sa makaya, kon dunay sobra sa inyong budget. Apan kon makuhaan na gani ang budget ninyong duha alang sa inyong pamilya, di na usab na maayo. Mao r aba tingali ang nahitabo mao nga nipalag ka na anang iyang gibuhat. Kon di siya makahimo sa imong request, pasagdi na lang siya kay mabungkag ang inyong pagpuyo.
Kon mahimo, dugangi ang imong income stream pinaagi sa mga sideline. Kon mopalag siya, estoryahe nganong ingon ka niana. Unya tibhangi ang imong gasto sa mga mahimong putlan pareho sa cell phone ug gadgets nga kon wa kinahanglana, mahimo rang karaan gihapon.
Ayaw na lang na padak-a kanunay ang inyong away kay lisod na kon mabungkag ang inyong pagpuyo tungod sa iyang pamilya. Iampo siya kanunay aron malamdagan ang iyang kaugalingon.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)