SA UNANG higayon akong nahimamat ug nahinabi sa personal ang magpapatigayon ug French consul Michel Lhuillier sa usa ka presscon alang sa umaabot nga launching sa iyang Michel’s Wine karong June 26, 8 p.m. nga ipahigayon sa Liv Super Club sa City Time Square.
Maayo kaayo mamaba si Senyorito Michel ug maayo sad mobinisaya. Mapasigarbuhon niyang gipaambit ang iyang edad nga 74 ug ang iyang sikreto sa kalampusan.
Liv super club
Usa ka red carpet fashion show ang mahitabo karong June 26 atol sa launching sa Michel’s Wine Night nga tambungan sa mga daghang artista sama ni Jennifer Lee ug ang mga maanyag nga modelo sa Sugbo.
Ang presscon gipahigayon sa Michelangelo Pizzeria sa Banilad ug gitambongan usab ni Raymond Go, ang tag-iya sa City Time Square ug Bryan Ang, co-owner sa Liv Superclub, Kenneth Dong, CEO sa Liv Superclub ug ni Ms. Aida Patana sa M. Talent Events and Promotion.
Pagka-showbiz
Dihang gipangutana nako si Direk Paul Soriano niadtong nag-promote siya sa Sugbo sa pelikulang “Kid Kulafu” kon tinuod ba karong June ang kasal nila ni Toni Gonzaga, durong balibad niya kay wa pa kuno nila ni mahisguti.
Unya diay karong June 12 gyud ang kasal matod pa sa atong duwende nga ipahigayon sa hometown ni Toni sa Taytay, Rizal.
Tsismis ka
Maora sad si Maricar Reyes dihang ako ning naka-one on one sa Gaisano Country Mall ug Gaisano Main niadtong Mayo, 2013.
Wala pa kuno silay petsa sa kasal. Apan pagka-June 8, 2013 mao na lay nigawas nga gikasal na sila ni Richard Poon.
Mao nga di ta kabasol kon mas daghan ang motuo sa tsismis sa showbiz kaysa sa mga artista nga magsigeg deny unya tinuod diay.
Enrique ug Lisa
Karong June 12, Biyernes, magpista na sad ang SM City Cebu kay naa silang Enrique Gil ug Liza Soberano alang sa promo tour sa ilang pelikulang “Just The Way You Are” sa Star Cinema.
Dunay meet ang greet ug mini show nga ipahigayon alas 5 sa hapon sa The Event Centre sa maong mall.
Ang “Just The Way You Are” showing na karong June 17 sa mga paborito ninyong sinehan.