KANAL. Sa mga miaging tuig bisan og mouwan lang og usa ka minuto mobaha dayon diri sa among dapit. Apan karon nga tinghuwaw abog sad kaayo kay nagsige pa ang trabaho sa kanal diri sa St. Anthony Village, Hi-way 77, Talamban.
Maayo gani tawon nga tinghuwaw pa ron nga gitrabaho sa Barangay Talamban ang kanal diri sa among dapit kay ig-abot unya sa ting-uwan sigurado ko nga mobaha na usab.
Kaniadto magsige ko og reklamo dinhi sa akong lindog kay ighuman sa uwan bisan og kadiyot lang lunopan dayon ang dalan. Gani, ako sad gi-Facebook ang hulagway sa baha diri sa among dapit.
Dihay usa ka higayon nga gitawagan ug gi-estoryahan ko ni Mayor Mike Rama tungod sa akong lindog sa baha diri sa among dapit ug sa akong gi-Facebook nga hulagway sa dalan nga gilunopan. Matud pa sa mayor ang budget alang sa kanal sa among dapit hapit na ma-release.
Niadtong buwan sa Enero ning tuig 2015 human sa Sinuog, gisultian sad ko ni Talamban Barangay Kon. Alex Leyson nga hapit na mogawas ang budget alang sa pagpakanal sa among dapit.
Gamay na lang nga panahon mahuman na ang kanal sa duha ka kilid sa dalan. Agi’g komedya, akong gisultian akong silingan nga maayo gyud nga moreklamo aron dali madunggan sa mga opisyales sa dakbayan.
Matud pa sa kapatas sa contractor sa kanal nga ipasemento sad kuno ang dalan igkahuman sa trabaho sa kanal. Maayo unta og tinuod aron makumpleto ang serbisyo sa mga namuyo diri sa Hi-way 77.
Kining proyekto sa kanal diri sa among dapit panahon pa ni sa unang administrasyon sa barangay. Hapit na lang ang sunod piliay mao pa intawon ang pag-implementar.
Ingon ani kahinay ang serbisyo sa atong kagamhanan. Maayo gani kay hataas ang pasensya sa mga residente. Ang among pag-antos mibunga gyud.
Salamat kaninyo mga opisyales sa barangay ug sa dakbayan sa Sugbo!
****
LAPOK. Gawas nga wa maglatay sa akong kaugatan ang linya sa dugo sa usa ka pulitiko, ang lain nga dakong rason nga nawad-an ko og gana moapil sa pulitika dinhi sa atong nasud mao ang kahugaw niini.
Ang tarong nga tawo buhatan og hugaw nga estorya o di ba labayan og lapok bisan og way dukit aron lang nga mogawas nga dautan sa panghunahuna sa mga botante labina kadtong dali matonto sa estorya nga hinanggaw.
Unya ang nakaparat kay kining mga tawo mohimo og estorya nga way bili o kusog mo-atake dunay mga salabutan tungod kay mga pulitiko ni sila ug hataas ang naabot nga edukasyon.
Tan-awa ang gibuhat sa mga bokador ni Bise Pres. Jejomar Binay gidaginot ang pagkatawo ni Sen. Grace Poe. Nagtuo ang kauban ni Binay sa United Nationalist Alliance (UNA) nga delikado ang kandidatora ni Binay kon modagan pagka presidente si Senador Poe.
Sa survey, nagsaka ang papolaridad ni Senador Poe samtang miubos ang kang Binay. Apan labaw lang gihapon si Binay og gamay ni Poe.
Gisugdan ang atake sa pagkatawo ni Senador Poe dihang mibalibad siya sa imbitasyon ni Binay nga siya ang kandidato pagka bise presidente sa UNA uban ni Binay sa sunod tuig nga piliay.
Si Toby Tiangco, ang iterim nga presidente sa UNA ang mibutyag sa pagkatawo ni Senador Poe nga usa siya ka bata nga pinalgan didto sa simbahan sa Jaro, Ilo-Ilo ug gi-ampon nila ni kanhi Fernando Poe, Jr. ug Susan Roces, nga way anak.
Miingon si Tiangco nga tungod kay pinalgan si Poe way klaro kon Filipino o Amerikano ba siya. Tungod kay American citizen man si Poe ug wa makaabot og napulo ka tuig ang iyang pagpuyo sa Pilipinas dili siya kwalipikado modagan pagka presidente o bise presidente.
Ang law-ay pa kay moingon si Bise Presidente Binay nga wa siyay labot sa mga estorya batok ni Poe. Sus, mao ni klase sa tawo nga magpresidente nga di makahibawo sa gibuhat o gisulti sa iyang ginsakpan? Pagpuyo oi!
(freezone.ellie588@gmail.com)