DEAR Noy Tikyo,

Tagoa ko sa ngalan nga Enrique. Tinun-an sa college.

Ang akong problema bahin sa akong gugma sa usa ka babaye nga taguon lang nato sa ngan nga Raiza.

Nagkaila mi niya sa dihang nag-summer job ko niadtong milabay nga tuig. Na-love at first sight ko niya nga kauban ra sab nako sa job. Bisan nahuman na ang among summer job, nagpadayon ang among friendship.

Tungod kay friend na mi, hadlok ko mosulti sa akong gugma niya kay basin og di na hinuon siya moduol nako.

Apan niabot ang punto nga naipit ko ug nakatug-an sa akong tinuod nga pagbati niya. Pero na-basted ko kay naa na diay siyay boyfriend.

Sakit man alang nako apan gidawat ko na lang kay wala man pod koy mahimo.

Naglisud ko og move on kay hangtud karon kanunay gihapon ming mag-uban ug mag-istorya. Para niya bisan og nabasted ko, gusto niyang magpadayon ang among friendship hinungdan nga padayon gihapon ang among communications.

Gusto na kong makalingkawas ning kasakit nga akong nasinati apan unsaon ko man nga naa pa man siya sa akong kasingkasing ug hunahuna. Unsay akong buhaton aron maka-move on nako?

Enrique

*****

Enrique,

Ang constant ninyo gihapong communication maoy nahimong babag aron nga malimtan mo siya ug maka-move on ka na sa imong pagka-basted niya.

Alang niya di kini problema, apan para nimo, matag panahon nga mag-uban ug magkaistorya mo, magdugang lang kini og samad sa imong kasingkasing knowing nga di ikaw ang iyang gimahal.

Nganong di ka man mohimo og desisyon nga palay-an siya? Barugi nga himuon mo kini ug di ka angay nga magpadala kaniya. Pinaagi niini, mahinay-hinayan mo nang makat-onan nga di gyud siya angay sa imong pagmahal.

Lisud kining himuon apan kon imo kining ma-overcome, dako kini og tabang aron nga di ka na masakitan og maayo.

Try sab og panguyab og laing babaye. Kay makatabang sab kini aron nga ma-divert nimo ang imong atensiyon ngadto niya. Di man lang siya ang nag-inusarang babaye ibabaw ning kalibutan. Makakita ka ra gihapon og babaye nga matun-an mong mahalon ug at the same time magmahal sab nimo.

Hinay-hinayi na siya og kalimot aron nga mahapsay na ang imong hunahuna ug kasingkasing. Pinaagi sab niini mahupay na ang gibati mong kasakit.

Noy Tikyo