APIL sa katungod sa tawo ang pag-organisa ug pag-apil sa mga kalihukan sa katilingban.

Nahipatik kini sa 1948 Universal Declaration of Human Rights ug gigarantiya sa atong kaugalingong Batakang Balaod.

Ingon sa mga eksperto sa tawhanong katungod nga niabot na daw'g 54 ang atong katungod isip tawo.

Ang pinakabag-ong naapil sa listahan mao ang katungod nga mogamit sa "internet" ug "social media."

Mao kini ang gibasihan sa pagkahimugso sa DECA Indangan Homeowners' Association Phase 1 (DIHOA-Phase 1) niadtong niaging Dominggo. Napili didto ang interim board ug mga opisyales nga gipangulohan ni Pres. Mr. Flor Crabajales, V. Pres. Mr. Ong, Sec. Ms. Riza, A-Sec. Ms. Jen, Treas. Ms. Alma, A-Treas. Ms. Jassy, Aud. Ms. Juvy, PIO Mr. Maning, Sgt-at-arms Mr. Rolly ug Mr. Casas.

Napili pod isip board sila si Michael, Elvin, Mazo, Cuadro, Amor, Crisologo ug Lynlyn.

Ang DECA Indangan usa sa pinakabag-ong subdivision sa Davao nga adunay upat ka Phases nga hayan moabot og 6,000 ka units. Di na mabangbang ang kadako sa panginahanglan sa pabalay sa dakbayan busa daw uhong sab nga naglipang ang mga subdivisions sa palibot.

Apan luyo niini, dako pa kaayo ang backlog sa pabalay ilabi na nga daghan gihapong mga informal settlers nga namuyo sa mga "urban poor colonies" sa siyudad.

Nindot unta nga naay balay apan mahal pa gihapon ang binulang bayad bisan sa mga low-cost housing projects sama sa DECA. Unta naa pay low-cost, socialized housing project nga mas ubos pa ang binulang amortization aron makaya sa mga mas daghang kabus.

Sakto kining gibuhat sa DIHOA sa pagtukod sa kahugpongan sa mga namuyo kay naay developers nga medyo maldito sab.

Kung walay modumbol sa ilang responsibilidad sa ilang proyekto, di sab buhaton.

Magdali dayon nga ma-turnover sa HOA ang ilang proyekto aron ma-turnover usab sa gobyerno ug ang gobyerno na unya ang mo-mentinar sa ila untang tulubagon.

Daghan na ang nahitabo nga modagan ang developer sa proyekto unya ang lokal nga gobyerno ang nagsangkiig sa problema.

Sa pagkatinuod, dili dawaton sa gobyerno ang proyekto sa private developers kung wa pa mahuman ang tanang nabutang sa aprobadong plano sama sa sementadong dalan, kanal, patubig, elektrisidad, club house, playground, entrance guard house ug uban pa.

"Dawli" o dawat-limpyo lang ang ubang developers kay kuwarta man sa gobyerno ang gamiton unya.

Busa matud pa ni Pres. Flor nga boluntaryo kining gidawat nga trabaho sa HOA officers ug dugang sa sakit sa ulo apan kinahanglan man nga naay organisasyon sa nanag-iya og balay sa subdivision aron maseguro nga tumanon sa developer ang iyang obligasyon ug mapanalipdan ang katungod sa katawhan.

Sa unang panagtigum, niguwa na ang pipila ka isyu nga ipatubag sa HOA officers ngadto sa developer sama sa tubig, entrance rail ug guard house, basura, seguridad, club house ug uban pa.

Naay nangutana kung pila ka security guard kay naa nay gipanglungkab nga balay.

Plano sa grupo nga iparehistro kini sa SEC ug sa HLURB aron legal ang tanang transaksyon niini.

Congrats ug good luck. Unta magpadayon ug magmalig-on kining maong panaghugpong.