SOUTH COTABATO -- Gibarugan ni Captain Rey Balibagoso, tigpamaba sa 102nd Brigade sa Philippine Army, nga dili sila magpadala sa hangyo sa New People's Army (NPA) nga hunungon ang operasyon bugti sa pagbuhi kang kanhi Private First Class Ken Subere.
Kini ang tubag sa militar human nga mihangyo ang pamilya ni Subere ngadto kanila nga undangon ang operasyon batok sa mga rebelde aron makauli ang ilang mahal sa kinabuhi.
Gibutyag ni Balibagoso sa Bombo Radyo nga gihimo sa gobyerno ang tanan aron makuha nga luwas si Ken.
Gidugang pa niini nga supak sa balaod ang gihimo sa NPA nga pagdagit sa usa ka sibilyan.
Gikanayon ni Balibagoso nga dili na sila makigsabot sa grupo ni Ka Efren nga usa ka lawless group.
Una nang gibutyag ni Balibagoso nga dili na sundalo si Subere human nag absent without leave sa trabaho sa diha nga miuli sa ilang dapit sa Lake Sebu ug didto na siya gidagit sa mga NPA niadtong mi-aging bulan.
Gi-imbestigahan sab sa militar ang mikatag nga balita nga si Subere gi-ingong kanhi miyembro sa NPA una misulod nga sundalo ug nadestino sa 27th Infantry Battalion. (Edgar E. Fuerzas)