SA niaging tuig nadiskobrehan nga ang Talisay City College (TCC) nag-operate og mga kurso nga way permit gikan sa Commission on Higher Education (Ched).

Ang mga kurso nga illegal nga gitanyag niini mao ang Bachelor of Science in Hospital Management, Master in Public Education ug Master of Arts inEducation.

Kini nabulgar human ang Ched nakadawat og reklamo ug sa dihang gitino kini nasuta nga tinuod gyud ang ilang nakuhang impormasyon.

Base sa records, ang maong eskuwelahan gitugotan lang nga makatanyag sa kursong Bachelor of Science in Elementary Education, Bachelor of Science in Secondary education, ug Bachelor of Science in Industrial Technology and Diploma in Professional Education.

Pero ambot og ngano ning tuiga nanawat man gihapon ang TCC og mga estudyante alang niadtong mga kurso nga sa gihapon kuwestiyonable bisan ug hangtod karon wa gani sila makakuha og permit ug wa pa usab maka-comply sa mga requirements sa Ched?

Si Dr. Edgar Martinez, TCC caretaker ug dean of colleges, mipasalig nga makakuha ra sila og accreditation sa Ched nga hangtod karon padayon pa nilang gilihok.

Makasiguro kaha si Martinez? Kini ra bang TCC gisakyan og maayo sa mga pulitiko hinungdan nga gubot pa sa lukot ang sitwasyon niini karon?

Kon simbako magkaguliyang na sab ni, ilabi na nagkaduol ang piniliay, dili kaha maapektohan na usab ang mga estudyante niini?

Giuna lang una to ni Martinez ang paghikay sa accreditation una pa sila manawat og estudiyante. Mao man ta gyud ni ang saktong proseso.

Pagkaluoy sab sa mga estudyante mora man hinuon og gipanaghap lang ang ilang kaugmaon.