MANAGSUON nga gikatahong notadong drug pusher nasikop atol sa buy- bust operation sa gawas sa balay sa mga suspek sa Zone 6, Sitio Riverside, Barangay Canduman, dakbayan sa Mandaue ang niadtong Sabado sa gabii.

Ang mga suspek giila nga si Alden R. Velasquez, 31, ulitawo, ug maguwang niini nga si Danilo, 39, parehong lumolupyo sa naasoy nga dapit.

Matod ni PSI Romel Luga sa Station 6 sa Mandaue City Police Office (MCPO)  nilungtad og duha ka tuig ang ilang pagpaniid sa duha ka mga suspek.

Dugang niya nga on-and-off ang operasyon sa duha hinungdan nga dili daling masakpan.

Gibutyag ni Luga nga nakuha gikan ni Alden ang duha ka mga gagmay ug usa ka medium-sized nga shabu atol sa operasyon samtang, usa ka pakete usab ang nakuha gikan ni Danilo kauban ang ubang mga drug paraphernalia.

Ang duha ka managsuon kinsa kasamtangang gitanggong sa prisohan gikatakdang mag-atubang og kasong may kalapasan sa section 5 ug 11 sa RA 9165 kon Comprehensive Dangerous Drugs Act.

Ang kampanya batok sa drugas gihingosgan karon sa tanang sanga sa awtoridad labi na ning pagsugod sa laing tuig nga tingklase.