UNSAON pagsulbad niining shabu nga nakadawat man og taho ang PDEA7 nga duna pay shabu laboratory dinhi sa rehiyon siete ug posibli nga dia dinhi sa Sugbo.
Gani ning uwahi bag-ong shabu nga kolor yellow nasakmit sa B. Aranas Extension, Duljo-Fatima nga hayan sa Sugbo ra gigama.
Ingon og naay kamatuoran kay wala man mohunong ang uban sa ilegal nga negosyo bisan sa sobsob nga pagpangronda subay sa pakiggubat sa administrasyon batok sa naghitak nga drugas.
Gani nag-una ang Sugbo sa problema sa drugas sumala pa ni Pres. Duterte atol sa 10th Phil. Councilors League.
Naa pa diay ang mga gaway nila ni Jeffrey “Jaguar” Diaz, Kerwin Espinosa, Franz Sabalones, Crisostomo “Tata Negro” Lllaguno ug uban pa ilabina nila ni Peter Co, Herbert Colanggo, Jaybee Sebastian ug Engelberto Durano sa New Bilibid Prison sa Muntinlupa.
Sa Cebu Provincial Detention and Rehabilitation Center (CPDRC) bulto sa shabu ang nasakmit sa hiniusang ronda sa PDEA, PNP ug BJMP maong nagpamontar ang gobernador og signal jammers.
Mga namaligyag drugas adto kuhaon sa usa ka Arman Tipon-tipon nga piniriso. Binilanggo nga si Maximo Cedeno nasakpang nagsuyop.
Druglord nga napriso Alvaro “Barok” Alvaro padayon sa ilegal nga negosyo sa CPDRC nga nasakmitan og tulo ka selpon ug drugas atol sa uwahing greyhound operation diin duna say nasakmit nga bank book nga dunay sulod P1.5M. Gipapahawa si jail warden Dr. Gil Macato.
Sa Cebu City Jail (CCJ) padayong nagpalusot og shabu sa gihimong pakisusi. Dihay giubos sa Oplan Tukhang ang 1,900 ka mga piniriso nga wala moundang sa drugas nga giingong gikan sa Ozamis.
Kusinero nga si Joseph Oliverio ug piniriso nga si Torrefiel Reynaldo nasakpan nga tigpalusot og drugas nga ihatod ngadto ni Maria Tisay Gamao nga giipon sa pagkaon.
Jerkin Oralde nga sakop ni Jaguar nga nadakpan adto magkuhaan og shabu sa usa ka Kuya sa CCJ. Mary Ann Labita nasakpang nagbutang og 19 ka ampules nga nubain nga gisulod sa pan.
Gani si Mayor Tomas Osmeña nagbutang og signal jamming devices sulod sa CCJ aron mapakgang ang pagsulod sa drugas. Kay nagpadayon ang negosyo ug bisyo sa drugas katahapan nga duna pay presensya sa shabu laboratory dinhi sa rehiyon.
Gawas sa gitaho sa PDEA7 daghan ang mitunol og inpormasyon nga dunay shabu lab sa Isla de Gato, Bantayan ug mga pribadong luna sa kabukiran sa lalawigan sa Sugbo.
May pangagpas nga naa ra kini hikaya o sugkaya sulod sa mga panimalay gumikan sa mga bag-ong ekipos aron dili mabantayan gawas kon magpakabana ang katawhan sa palibot.