MANANAMBAL patay human gipauwanag bala sa wa mailhing mamumuno samtang nagpakaon sa iyang binuhing hayop niadtong Dominggo sa alas 6:30 sa buntag sa bukirang lugar sa Barangay Kabalaasnan, lungsod sa Dumanjug.
Si Tomas Bejona, 48, minyo ug mag-uuma nailang “Tambalan” patay human gibuk-an sa iyang ulo ingon man gitusaktusak sa mga bala ang nagkaiyang parte sa kalawasan.
Si PO3 Dionesio Tagopa, imbestigador sa Dumanjog police station, nagkanayon nga ang asawa sa biktima nga si Gaudiosa 51, maoy nakadiskubre sa patyang lawas niini.
Sumala pa niini nga ang iyang bana sayo sa buntag nga nagpakaon sa ilang gibuhing kabaw didto sa kalibunan mga 100 metros gikan sa ilang panimalay.
Apan pagkalas 6:30 sa buntag nakadungog nalang siyag butobuto sa wa matinong armas pipila ka metros gikan sa ilahang panimalay pero wa lang siya manumbaling.
Pag-abot sa alas 7:00 sa buntag nangita na siya sa iyang bana kay dunay duha ka mga babaye nga niabot sa ilaha nga gustong magpatambal og “Pabinisaya”.
Nisum-ok siya sa kalibunan pero maoy nisugat sa duha niya ka mga mata ang patayng lawas niini nga naglunang sa kaugalingong dugo.
Wa na mahitsura ang ulo niini kay gipusil makadaghang hihayon, samtang ang lawas natusaktusak sab sa mga wala matinong bala sa armas.
Si PO3 Tagopa niingon nga gisubay nila karon ang trabaho sa biktima nga tambalan sa maong dapit kun wa bay mga tawong nasuko niini sa lugar.
Matud niya nga pulos tak-om ang mga residente sa lugar dihang ilahang gipangutana ilabi na nga ang biktima dili gyud taga diha kay lumad nga nagpuyo sa pikas bukid nga Barangay.
Ang kabanay hinuon mibutyag nga dunay gikaaway sa diskuhan ang biktima niadtong mi-aging bulan dihang hubog pero nagkauliay na sila niini sa iyang paryente.