GILUSAD sa Department of Health sa Sugbo kagahapon ang nasudnong programa nga nagtinguha matabangan ang mga lugar nga peligro sa kalamidad ug adunay labing daghang mga kabos pinaagi sa pag-atiman sa ilang panglawas.
Si Health Assistant Secretary Dr. Gerardo Bayugo, ang nangulo sa kalihokan nga High Impact 5 Summit on Health sa social hall sa Kapitolyo uban ang mga opisyal sa nagkadaiyang mga ahensiya sa kagamhanan.
Matod niya 43 ka mga probinsya sa nasod ang unang makapahimulos niini apil ang Sugbo, ug sa lalawigan ang mga prayoridad ang mga lungsod sa Sta. Fe, Tuburan, Dalaguete.
Tumong sa programa ang paghatag og prayoridad sa pagpaminos sa inahan nga mamatay samtang nagsabak o nanganak, pag-atiman sa bag-ong gihimugso nga mga masuso ug kabataan nga ubos sa 5 anyos, pagpugong sa pagkatap sa human immunodeficiency virus ug Acquire Immune Deficiency Syndrome, malaria ug ubang makatakod nga mga sakit ug paghatag sa serbisyo nga gikinahanglan alang sa maayong panglawas.
Sa iyang pakigpulong, si Bayugo namahayag nga pinaagi sa bag-ong programa, ang nasudnong kagamhanan padayon nga mopatuman sa nag-unang health services sa mga pamilyang Pilipino aron makab-ot ang gisaad ni Presidente Benigno Aquino III nga Kalusugan Pangkalahatan nga kabahin sa Millenium Development Goals.
Tinguha nila nga wala nay mamatay nga inahan nga manganak pinaagi sa regular nga pagpa-check up sa mga health center ug maatiman ang mga masuso ug bata pinaagi sa paghatag og libre nga bakuna ug pagpa-enrol sa mga kabus nga pamilya sa Philhealth.