DUHA ka mga piniriso sa Cebu Provincial Detention and Rehabilitation ug usa ka jail guard ang nangaangol human nadisgrasya ang ilang gisakyan sa Barangay Bahay, lungsod sa Sibonga alas 9:30 kagahapon sa buntag.

Si Romeo Manansala, acting warden sa CPDRC, niingon nga gikan sa Barangay Kalunasan, dakbayan sa Sugbo ang mga bilanggo ug padung motambong og husay sa lungsod sa Argao apan, pag-abot nila sa Barangay Bahay kalit nawad-an og brake ang Fuso Canter (SGH-111) nga gimaneho ni PG1 Roberto Creer, hinungdan sa pagkaaksidente nila.

Si PO3 Herbert Pananganan, imbestigador sa Sibonga Police Station, nga 15 ka mga inmate ug 5 ka escort apil ang drayber ang luwan sa sakyanan atol sa hitabo.

Iyang giila ang mga naangol nga sila si Ricardo Dueñas, 50, nag-atubang og kasong may kalambigitan sa ginadiling drugas ug Arthur Lanticse, 38, nag-atubang og kasong pagpanglugos.

Apil sa naangol si PG1 Joy Cabahug.

Sila gidala sa Isidro Kintanar Memorial Hospital sa Argao.

Lakip sa sakay si Ciriaco de los Santos Jr., ang suspek sa pagpatay sa hepe sa Alcoy Police Station nga si Insp. Crisanto Abella niadtong Agusto sa niaging tuig.

Matod ni Manansala nga nagisi ang dapit sa kilay sa duha, apan nakatambong lang gihapon sila sa ilang tagsatagsa ka husay sa korte sa Argao.

Si Panaganan nisaysay sa Sun.Star Superbalita nga pag-abot sa sakyanan sa dapit nahitaboan, ang brake niini kalit nibasiyo ug dili na motapot hinungdan nga gipadaplin ni Creer sa kahadlok nga mabanggaan ang gisundan niini nga awto ug trisikol.

Apan nabangga ang Canter sa railings ug natumba sa kilid sa gamay nga bakilid.

Ang mga pulis na sa Argao Police Station ang nihatod sa mga piniriso sa Argao Regional Trial Court samtang gikuha og laing sakyanan sa CPDRC ang nadisgrasiya nga sakyanan.

Si Manansala niingon nga halos 25 ka tuig na nga nagmaneho si Creer ug tu­ngod sa aksidente ma­ngayo sila og dugang sak­yanan sa Kapitolyo.