WALA pa katugpa. “High,” sa Inenglis pa, ang pamati sa mga gapabiling habog ang labyog sa pangutok gikan gagamit og gidiling druga sama sa shabu.
Taas pod ang panghupaw sa atong kadagkoan, kalipongon sa makapungot nga kalibog kon unsaon kon kanus-a pod mapakgang ang pahipi nga patigayon ini.
Pak-an nga suliran, idlas nga kamangtas! Tungod kay dugay man lagi dakpon ang hinungdan niding gadala'g labad, gaduga'g tugaw sa kahapsay ug kalinaw, naaghat na lang ang atong kagamhanan sa pag-unay og kumkom sa balaod.
Tungod niini, daghan nang mga gipasanginlang' tigpahuyot og shabu — gibasol nga gatukmod sa mga wala pa katugpa — ang nalukapa ug natikay-ang diha sa gabanaw nilang dugo human giluthang.
Gihaya pod ang kaangayan. Nabaniog ang gitawag nga extrajudicial killings kun pagpatay sa mga gikatahapan, wala tagai’g kahigayonan nga makapanalipod sa ilang tawhanong katungod diha sa hukmanan.
Mga kabus ra kasagaran ang gipatumba. Bulahan ang mga dagkong drug lord, tataw nga napanalipdan sa ilang bahandi.
Bitaw, dali rang bayran ang kagawasan diin pabiling gusbat ang criminal justice system nga galangkob sa kapulisan, hukmanan, ug bilanggoan.
Samtang, pabiling huyang ang gubat nga gipasiugdahan ni Duterte batok sa gidiling druga, padayon ang pagkatap sa kabalaka mahitungod ini.
Gani, nasayran nato nga gapabuyag pod ang mga sinaligan diha sa kabaranggayan.
“Illegal drug use still rampant among barangay workers,” sumala sa gikataho bag-ohay lang.
Nasayran nato nga diha’y 50 ka mga sinuholan sa 11 ka mga baranggay nga napamatud-ang nahapla sa drug tests nga gipahigayon sa Cebu City Office for Substance Abuse and Prevention (Cosap).
Ay, dili baya ni kahibulongan kay hagbay ra pod gani natong nasayran nga duna po’y pipila ka mga pulis nga nalambigit ini ug nasakpan nga gahithit pod, pwera buyag!
Lakip sa mga badlungon ang mga gituohan natong mga tigpatuman sa balaod, ug ang pamuno mismo sa nasod malapason pod sa iyang pagpatugot sa gitawag nga “culture of death.” Kaayong pakungon!
Makapahak sa atong pagsalig kining malipoton nga linihokan sa atong mga tinugyanan. Ang pagbudhi sa tul-id nga sumbanan mao’y pagyatak sa dyosnon ug tawhanon nga kapasikaran.
Kon dili sila mag-usab, aber, unsa man kuno’y ilang ikapamatuod nga sila angay saligan ug tahoron sa gitumbok nga mga kriminal. Kon ang duna’y mga katungdanan dayag nga daginoton og kaligdong kay salawayon pod diay, nan, unsa’y ilang katungod nga molimpyo ug mohinlo sa atong katilingban?
Dili sila sarang nga mahimong sulundon kon hiwi pod ilang pamaagi, sukwahi sa tarong ug pinaangay nga pamalakad. Padayon ang pinatyanay ug paglubong sa balaod diha sa dugoong lapok samtang magpatuyang pod ang kadagkoan.
(geemyko@gmail.com)