PABILIN nga way buling ang record sa GMA-7/DySS human ilang gipilde ang Sun.Star Cebu/Superbalita, 94-82 sa nagpadayong duwa sa Newsmen Basketball Association in Cebu (NBAC) sa Cebu Eastern College gym niadtong Dominggo.
Ang GMA-7/DySS (3-0) maoy nagkontrolar sa duwa gikan sa first quarter pinaagi sa pagpangulo ni Super Gabriel Bonjoc kinsa nipakatap og 46 puntos nga gibituonan sa iyang 9 ka three point bombs ug giabagan ni Capisnon pinaagi sa iyang 15 puntos.
Si Riel Mayol sa Sun.Star Cebu/Superbalita (1-2) mitali og 24 puntos samtang nibuga og 15 puntos si Philip Cerojano ug 12 puntos ang namugna ni Xio Ygot.
Midaog ang Cebu Daily News batok sa TV5, 82-71 sa unang duwa alang sa ilang standing 2-1 samtang ang TV-5 nahagsa sa 2-2 win-loss record.
Ang maong duwa gibituonan og duha ka ejection sa matag team diin si Jonas Panerio sa CDN ug Noel Sanico sa TV5 pulos wala makatiwas sa duwa gumikan sa nahitabong kumosyon.
Si NBAC Commissioner Brother Bobby “Knight” Enoferio nipahamtang og silot sa duha ka star player nga nagtangang og one game suspension.
Si Panerio kinsa naila sa ilang flawless three point shots dili makaduwa sa katapusan nilang duwa sa eliminasyon samtang si Sanico moserbisyo sa iyang suspension sa quarterfinals.
Ang CDN gipangulohan ni Tabuco pinaagi sa iyang 26 puntos samtang ang TV 5 gitimonan ni Rommel Catolico.