NADEPENSAAN ni Ko­be Paras ang iyang slamdunk title sa FIBA 3x3 Under-18 tournament ka­gahapon sa Hungary.

Ang anak ni Philippine Basketball Association (PBA) legend Benjie Paras nakaabante sa semi-finals human nakatigom og 56 puntos sa qualifying round.

Gilauban niya sa se­mis sila si Jalek Felton sa United States, Agustin Da Costa sa Uruguay, ug Mark Boros sa host Hungary.

Sa unang pagsuway ni Paras sa semi-finals, gipauntol una niya ang bola una siya nag-reverse dunk. Iya kining gisundan og between-the-legs nga hansak aron pagposte og 52 puntos sa semi-finals.

Igo na kini aron ma­kaabante sa final round ang Filipino teenage basketball sensation.

Gikaparang ni Paras sa final mao si Felton.

Gisugdan ni Paras ang iyang kampanya sa finals pinaagi sa reverse windmill dunk human niya gipauntol ang bola.

Sa iyang ikaduhang gipakita, gilayatan ni Paras ang upat ka mga tawo una niya gihansak ang bola.

Sa katapusang hansak ni Felton, nakapuntos kini og 29, usa ra’y kuwang aron makakuha’g perpektong puntos sa tulo ka judges.

Dihang iya nang turno alang sa katapusang hansak, gilayatan ni Paras ang iyang kauban nga si Ricci Rivero dayong mugna og reverse windmill dunk alang sa perpektong 30 puntos.