NAINAT na sab sa overtime ang kombati apan ning higayuna, lahi na ang resulta.
Si LeBron James ug ang Cleveland Cavaliers nakabawos sa host Golden State Warriors, 95-93, kagahapon pinaagi sab sa overtime aron tablahon ang National Basketball Association (NBA) Finals series, 1-1.
Ang Cavaliers, nga napilde sa Game 1 pinaagi sab sa overtime, 100-108, ningsandig na sab og maayo kang James apan ning sangkaa, nakakuha na og saktong suporta ang four-time MVP.
Human nipugnit og 44 puntos sa Game 1, si James padayong nagbangis ug nihipos kini og 39 puntos sa iyang triple-double performance.
Nakahatag sab og 16 rebounds ug 11 assists si James sulod sa 50 ka mga minutos niyang pagduwa.
Ang sentro sa Cavaliers nga si Timofey Mosgoz niamot og 17 puntos alang sa kadaugan, nitampo og 13 puntos si JR Smith samtang si Matthew Dellavedova nihatag og siyam ka puntos.
Si Dellavedova, kinsa maoy gipiyalan sa pagtapak sa haw-ang nga nabiyaan sa naangol nga si Kyrie Irving, mao ang nakapasulod sa nakapadaog nga duha ka freethrows sa Cavaliers sa himatyong segundos.
“I tried to give it all to my teammates. And they do a great job of giving it back to me. Total team effort,” matod ni James.
“To be back in the same position we were in three days ago and to come back and even the series is big time.”
Ang labing pambato sa Warriors nga si Stephen Curry nagkagidlay sa iyang mga itsa apan ang iyang layup sa hinapos nga bahin sa regulation period maoy nakapugos og overtime.
Si Curry, kinsa maoy kasamtangang MVP, mao sab ang nakahatag sa Warriors og 93-92 nga labaw sa nahabiling 29.5 segundos sa overtime.
Sa sunod nga posisyon, niamag unta ang poruhan sa Warriors nga mailog ang kadaugan dihang napalakan ni Draymond Green ang layup ni James.
Hinuon nagpabilin gihapon sa Cavaliers ang posisyon sa bola. Ang tirador sa gawas sa Cavaliers nga si James Jones nasipyat sa iyang three-point shot ug tayming nga nakuha ni Dellavedova ang offensive rebound.
Gi-foul dayon sa Cavaliers si Dellavedova. Kalmadong gipasulod sa Australian star ang iyang duha ka freethrows aron paginhawon og luagluag ang Cavaliers 94-93 sa himatyong segundos.
“That’s the classic thing you practice as a kid growing up,” matod ni Dellavedova kabahin sa iyang krusyal nga freethrows. “I felt like I’ve been in that situation a million times before.”
Human sa freethrows ni Dellavedova, nasipyat si Curry sa iyang jumpshot unya nakuha ni James ang rebound ug gi-foul dayon siya sa Warriors.
Napasulod ni James ang usa sa iyang duha ka freethrows sa nahabiling 4.4 segundos aron iselyo ang kadaugan.
Ang Warriors gipangulohan ni Klay Thompson pinaagi sa iyang 34 puntos samtang si Curry, kinsa igo lang mitali og 5-of-23 shooting, nakaamot gihapon og 19 puntos.
“Shots I normally make I knew as soon as they left my hand that they were off. That doesn’t usually happen,” batbat ni Curry.
“Mechanically, I don’t know if there is an explanation for it, just didn’t have a rhythm and didn’t find one the whole game.” (AP)