MURA’G mas kuyaw si Cleveland Cavaliers backup pointguard Matthew Dellavedova nga makapuhal sa poruhan sa Golden State Warriors sa pagdaog sa National Basketball Association (NBA) Finals kumpara kang Kyrie Irving.
Ang 24 anyos nga Australian maayong nakaduwa kagahapon sa Game 2 sa NBA Finals aron tabangan ang Cavaliers nga bawsan ang Warriors, 95-93, pinaagi sa overtime nga maoy nakatabla sa series, 1-1.
Napugngan ni Dellavedova ang labing sinaligang pointguard sa Warriors nga si MVP Stephen Curry ug nakapasulod sab siya og duha ka krusyal nga mga freethrows.
Si Dellavedova maoy gipiyalan sa Cavaliers sa pagtapak sa haw-ang nga nabiyaan sa ilang starting pointguard nga si Irving, kinsa gioperahan sa walang tuhod sa miaging adlaw ug dili na makabalik sa series.
Dihang nibaniog nga dili na makabalik si Irving, adunay mga nagtuo nga napupos na ang paglaom sa Cavaliers nga makalangkat sa labing una nilang titulo.
Apan sa gipakita ni Dellavedova sa Game 2, napamatud-an sa Cavaliers nga buhi pa kaayo ang ilang paglaom.
Gumikan sa depensa ni Dellavedova, nagsalimoang ang duwa ni Curry, kinsa igo lang mitali og 5-of-23 shooting ug 2-of-15 sa three-point area.
Mao kini ang labing ngil-ad nga duwa ni Curry sa tibuok season. Hinuon nakamugna gihapon kini og 19 puntos.
Sa pangutana kon unsa’y gibuhat ni Dellavedova aron mapugngan siya, si Curry mitubag: “Nothing really, just besides playing their game plan and playing defense like every pro is supposed to.”
Malaumon si Curry nga dili na kini mahitabo og balik kaniya ug aduna siya’y himuong adjustments sa pagpadayon sa series.
Sa mga higayon nga si Dellavedova mao magbantay kaniya, si Curry mitali og 0-for-8 fieldgoal, 0-for-5 sa three-point area ug adunay upat ka turnovers.
“You’ve got to give him credit. He made big plays,” matod ni Warriors scoring leader Klay Thompson kabahin kang Dellavedova. (AFP)