NABASLAN sa Cleveland Cavaliers ang Golden State Warriors paagi sa kulbahinam nga 95-93 nga kadaogan sa Game 2 atol sa ilang best-of-seven NBA Finals kagahapon.

Niasa ang Cavaliers kang Lebron James sa kadaghan nga higayon sa opensiba aron makamugna og play.

Nihuman si Lebron og 39 puntos alang mangulo sa Cavs samtang nipatak si Timofey Mozgov og 17 puntos. Higpit ug dikit nga away sa upat ka kwarter nga nahuman pa sa overtime.

Adunay higayon nga makontrolar sa Cavaliers ang dula paingon sa kataposan diin nibinat sila og kinadak-an nga labaw nga 11 puntos apan igo lang kini napanas sa Warriors gikan sa tres minutos nabilin ug paubos. Nakalusot si Stephen Curry sa depensa nila Lebron ug Tristan Thompson ug midiretso pagdrive sa iyang finger roll aron matabla sa 87-tanan sa walo ka segundos nabilin.

Sa nahibilin nga segundos, nisulay si Lebron pagdaug sa iyang jump shot apan igo lang nigawas. Nasulayan sab kini nga i-tip ni Thompson pasulod sa usa ka segundo nalang pero wala gyapon hangtod napugos sa overtime.

Una nilabaw ang Cavs sa dihang nipasulod si Iman Shumpert og tres ug nasigundaan dayon og dos ni Lebron apan nahinayhinayan pa kana og kamang sa Warriors.

Nipasulod si Draymond Green og duha ka sunodsunod nga dos ug duha ka free throw ni Curry aron maangkon og usa ka labaw, 93-92. Nabalik og kuha ang labaw sa Cavs human napasulod ni Matthew Dellavedova ang duha ka freethrow, 94-93, gikan sa foul iyang nakuha kang Matt Barnes sa 10 segundos nabilin sa sobra nga regulasyon. Sa turno sa Warriors, wala nasulod ang shot attempt ni Curry sa unom ka segundos nabilin diin napaingon kang Lebron ang bola.

Nihatag ang Warriors og foul sa upat ka segundos nabilin aron mabutang si Lebron sa freethrow diin usa lang iyang napasulod sa duha. Sa nahibilin nga segundos wala nakakuha og saktong play ang Warriors aron matabla ang siris sa 1-1.

Sa postgame interview, ingon niya nga dili na nila kinanlan nga doblehon pa ilang confidence bisan tuod nga underdog sila batok sa Warriors.

Si Klay Thompson nangulo sa Warriors sa iyang 34 puntos labina sa pagdikit sa dula samtang si Curry nalimitahan lang 19 puntos. Idula ang Game 3 sa balwarte sa Cavaliers.