PADAYON nga gipanawagan sa kapolisan kung kinsa ang pamilya sa patay'ng lawas nga naglutaw niadtong Domingo mga alas 6:00 sa buntag sa suba sa Ulayan River, Sitio Ulayan, Barangay Malinao, lungsod sa Kalilangan, Bukidnon.

Narekober ang patay'ng lawas sa grupo nga gipangulohan ni Police Inspector Charlie Pajo Nemeño uban ang Kalilangan rescue personnel.

Sa inisyal nga imbestigasyon, nasuta nga ang patay'ng lawas ang anaa na sa pagkadugta nakaangkon og usa ka samad pinusilan sa iyang ulo nga mao'y usa sa gitouhang hinungdan sa iyang kamatayon.

Ang biktima gihulagway nga usa ka lalaki, anaa sa 25 ngadto 35 anyos ang pangidaron, adunay katas-on nga 5’2 ngadto 5’3, nagsul-ob og pantalon nga kolor itom, sweatshirt ug kolor brown nga t-shirt.

Samtang wala pay pamilya nga mi-claim sa patay'ng lawas gidala kini ning panahona sa Villa Jusa Funeral Parlor nga nahimutang sa Wao, Lanao del Sur.

Ang kapolisan sa Kalilangan Police Station mihimo pa og pakisusi kung kinsay responsible sa pagpatay sa biktima ug ingon man mahibaloan ang identipikasyon niini aron makatabang usab sa gihimong imbestigasyon. (SVB)