GIHANGYO ni Captain Patrick Martinez, kinsa tigpamaba sa 4th Infantry Division-Philippine Army (4ID-PA), ang mga lumad nga mobalik na sa ilang puloy-anan didto sa Sitio Camansi, Barangay Banglay, lungsod sa Lagonglong, Misamis Oriental.

Mahinumduman, mokabat sa 50 ka mga pamilya diin mokabat sa 250 ka mga indibidwal ang namakwit ug mibiya sa ilang mga puloy-anan sa naasoy'ng sitio human sa gi-ingong pagpanghasi nga gihimo sa kasundalohan niaging adlaw.

Una na nga nangayo og pasaylo is Martinez sa giingong usa ka sakop sa sundalo nga giingong kanhi miyembro sa New People's Army nga mibungat og dili maayong pulong nga gikasakit sa mga residente.

Niini mi-awhag ning panahona si Martinez sa mga lumad nga mobalik na sa ilang puloy-anan tungod kay ila na nga giimbestigahan ang ilang sakop.

Buot ni Martinez nga sa pagbalik sa mga lumad sa ilang dapit, ilang hisgotan ang kahusay ug kalinaw nga mapatuman sa ilang lugar.

Adunay duha ka mga rason nga gihatag si Martinez nganong anaa ang presensya sa kasundalohan sa ilang lugar.

Una niini ang ang pagsuporta sa kapolisan tungod kay ang mga walhong pundok ang adunay mga warrant of arrest nga maoy responsible sa pagpanulis, panghasi, pangkidnap ug uban pa.

Ikaduha niini mao ang pakigtambayayong o kooperasyon sa uban ahensya sama sa Local Government Unit, Deparment of Education ug uban pang ahensya nga mohatag og programa sa ilang lugar aron mapalambo.

Hangyo ni Martinez sa mga lumad unta magtinabangay sila ug mosuporta kanila tungod kay alang man kini sa kalamboan sa ilang lugar.

Sa laing bahin pormal na nga mopasaka og reklamo ang mga lumad sa giingong pagpanghasi sa usa ka sakop sa sundalo. (SVB)