PATAY ang usa ka lalaki human giluba samtang natulog kagahapon alas 5:00 sa buntag sa Zone 6 Kevin Drive, Bayabas, Dakbayan sa Cagayan de Oro.

Ang biktima mao si Roque Jaime, lumad nga taga Kalilangan, Bukidon, samtang gitumbok nga suspetsado si Julito Perolino, taga Baroy Dako, Lanao del Norte.

Si Jaime ang kasamtangan nga kaipon sa kanhi asawa ni Julito nga si Lolaida Perolino, diin unom ka bulan pa lamang nga nag-ipon ang duha.

Sa inisyal nga imbestigasiyon sa kapolisan sa Police Station 4 (PS4) sa Carmen sa pagpangulo ni Police Officer 3 Paul Naces, imbestigador sa maong buhatan, gibutyag niini nga mga alas 10:00 sa gabii niabot si Julito sa gipuy-an ni Jaime ug Lolaida.

Gi-ingon tuyo ni Julito nga kuhaon ang Pantawid Pamilyang Pilipino Program (4Ps) nga card gikan kang Lolaida.

Gi-ingong gipugos ni Lolaida sa pagkanaog ang iyang kanhi bana apan nihangyo kini mga magpabilin una tungod kay mangadlawon na lang pagbalik sa Lanao.

Tungod sa hangyo ni Julito, nisugot na lang si Lolaida nga maglabay sa oras ug matulog sa ilang gipuy-an ang iyang kanhi bana human usab kini nipasalig nga walay himuong dautan.

Nasayran nga dunay mga anak si Julito ug Lolaida nga gibiyaan sa naulahi didto sa Lanao.

Apan sa maong higayon, nakamata na lang si Lolaida sa singgit sa iyang kaipon nga nagpakitabang ug nakita na lang napuno kini og dugo tungod sa samad nilubaan.

Gibutyag usab sa kapolisan nga ang maong insidente nasaksihan sa unom ka tuig nga anak ni Lolaida, kinsa nibutyag nga gisakyan sa suspek ang biktima samtang natulog ug giluba dayon daling misibat.

Girespondehan usab sa Scene of the Crime Operatives sa pagpangulo ni Police Senior Inspector West Edquila ang insidente ug nasuta nga nakaangkon og usa ka samad dinunggaban sa wala nga bahin sa dughan ang biktima hinungdan sa iyang kamatayon.

Ang patay nga lawas sa biktima ang kasamtangang anaa sa Bollozos Funeral Parlor sa Bulua ning dakbayan.