SA labing unang higayon, himuon sa dakbayan sa Danao sa amihanang bahin sa lalawigan sa Sugbo ang laing Off-Road Triathlon sa nasod, ang XTERRA Danao.
Magtigi ang nagkadaiyang off-road triathletes ug enthusiats sa giisip nga labing lisod nga bike course sa Sugbo ug sa nasod.
Karong Abril 23 himuon ang panagtigi sa nagkadaiyang triathletes sa kalibutan.
Una lang kini sa tulo ka mga edisyon sa XTERRA Danao nga molungtad hangtod sa 2019.
Matod ni Princess Galura, General Manager sa Sunrise Events Inc., (SEI) ang organizer sa maong aktibidad, nga mo-qualify sa XTERRA World Championship ang 51 ka triathletes nga masulod sa nagkadaiyang kategoriya.
Ang XTERRA Danao event gilangkuban og tulo ka mga kategoriya.
Una mao ang XTERRA full distance diin anaa kini 1.5 kilometros nga langoy, 40KM nga off-road bike ug 10KM nga trail run.
Ikaduha ang XTERRA lite distance nga adunay 750 ka metros nga langoy, 20KM nga bisikleta ug 5KM nga dagan.
Ikatulo ang XTERRA duatlon nga adunay 3KM nga dagan, 20KM nga bisikleta ug laing 5KM nga dagan.
Malipayon si 5th district Rep. Ramon Durano IV nga sa Danao ipahigayon ang laing XTERRA series sa nasod aron mas molambo pa ang turismo sa dakbayan.
Dugang sa kongresista nga tungod kay sa dakbayan sa Danao himuon ang kompetisyon, dili kini makalimtan sa triathletes tungod sa ilado niini nga mountain bike course.
Moabot sa $15,000 ang madawat sa pro-price winner, P120,000 alang sa Asian Elite.
Sa labing ulahi nilang natala, miabot na sa 223 ang nakarehistro sa kompetisyon.
Naglaom ang organizers nga moabot sa 300 ngadto sa 350 ang mga mangapil niini.
Ang mopatigbabaw nga 51 sa Danao XTERRA makasalmot sa kompetisyon sa Ritz Carlton, Kapalua, Maui, ug Hawaii.
Matod ni Judy Gabato sa Department of Tourism Central Visayas nga pinaagi niini mas molambo pa ang Danao, nga giingon nilang “one of the best sports tourism in the region.”
Manukad ang lumba sa Coco Palms Beach Resort. Gipaneguro sa Danao Traffic nga dili kini makabalda sa mga motorista ang pagpahigayon sa kompetisyon.