DI na makalingkawas gikan sa prisohan ang tulo ka mga Romanian national nga nangadakpan sa kasong automated teller machine (ATM) skimming.
Way girekomendar nga piyansa o non-bailable ang kasong theft in relation to Cybercrime Prevention Act nga giatubang na nila karon.
Girekomendar sa Cebu City Prosecutor’s Office nga isaka ngadto sa korte ang mga kasong kalapasan sa Access Devices Regulations Act ug theft in relation to Cybercrime Prevention Act batok kanila ni Romanian nationals Ionut Alexandru Mitrache, Razvan Aurelian Stancu, Ion Costel ug sa wa pa madakpi nga si Mircea Jordan, alyas Jozsef Gal.
Si Cebu City Prosecutor Liceria Rabillas nitug-an nga gi-aprubahan niya ang rekomendasyon sa investigating prosecutor nga si Ma. Theresa Casiño labot niini.
Sigun ni Rabillas, way piyansa nga girekomendar alang sa duha ka mga kasong theft in relation to Cybercrime Prevention Act batok sa maong mga langyaw.
Nunot niini, magpabilin sa prisohan ang nahisgutang Romanian nationals samtang husayon ang kaso batok kanila sa korte dinhi sa Sugbo.
Anaa usab sa P24,000 ang piyansa sa kasong kalapasan sa Access Devices Regulations Act batok kanila.
Una niini, ang Landbank of the Philippines nireklamo ngadto sa National Bureau of Investigation (NBI) 7 labot sa pagkabiktima sa daghan nilang depositor sa ATM skimming.
Nadakpan ang tulo ka mga langyaw niadtong Biyernes ug nakuhaan sila sa nagkadaiyang skimming device.
Ang ilang abogado nga si Christopher Ruiz niingon nga tun-an pa niya ang resolusyon sa piskaliya alang usab sa sunod nila nga legal nga lakang.
Posibleng moduso ang ilang kampo og motion for reconsideration sa piskaliya o petition for review ngadto sa Department of Justice.