DRUGA, armas, inhustisya, pagkawalay bili sa moralidad, sa kaangayan ug sa pagrespeto sa sekswalidad, kakulang sa pagkaon, trabaho, pinuy-anan, ug edukasyon ug daghan pa nga maoy gamot-hinungdan sa mga panghitabong kriminalidad sa atong nasud.
Ang silot sa kamatayon ba gipanday lamang alang niining mga linupigan, kabus ug timawa? Mao ba kini ang tubag o solusyon aron mahunong ug maminus-minusan ang kaso sa pagpatay, kriminalidad sa atong katilingban?
Ang isyu sa Capital punishment kun "Death Penalty" nabanhaw na sab sa mga hunahuna sa atong mga magbabalaod. Buot nilang mamahimong opisyal nga balaod batok sa mga tawo nga giisip nga basura, walay bili ug babag sa katilingban. Wala na bay tsansa pa nga mabuhi ug mabag-o ang usa ka tawo nga mapamatud-an siyang sad-an?
Daghang mga pagduki-duki nga ang pagpahamtang sa silot sa kamatayon wala makapahunong ni makapaminus, makapaus-os sa kriminalidad ug mga sunod-sunod nga pagpatay sa atong nasud. Ang hinungdan tungod kay wala kini makasulbad ug makatubag sa unsay gamot-hinungdan.
Ang dakong papel karon sa tibuok simbahan ug sa atong gobyerno nga mao unta ang pagprotekta ug pagpalig-on sa gambalay ug panginahanglanon sa atong katilingban labi na gyud ang pamilya.
Subay sa atong pagtoo, nga ang matag biktima sa maong "judicial killings" dunay pamilya ug nagkinahanglan kini sila sa tinuod nga hustisya ug pag-alim. Kay ang tinuod ug sakto nga sistema sa balaod nga silot, dili moresulta ngadto sa pagpatay, kon dili mohatag hinuon kini og lugway alang sa mga biktima ug sa pamilya nga maprotektahan ug mag-usab sa bag-ong dagway sa kinabuhi.
Ang kuyaw kung mahimong balaod na ang death penalty sa atong nasud mao nga gamiton kini sa lain-laing pamaagi aron sa pagpakigtransaksiyon sa mga dautan, kurakot ug mga personal nga interes, kaayohan.
Kini sab gamiton na hinuon sa pag-abuso sa daghan pang inosenteng kinabuhi sa tawo.
Ang death penalty nahisupak kini sa prinsipyo sa pagpalambo sa "culture of love and life".
Busa, dili ta matingala ngano daghan pa ang dili gusto sa pagpatuman sa balaod sa death penalty. Kinahanglan nga atong ireporma ang kasagrado sa pamilya diha sa pagtudlo nga ang matag usa kanato may kinabuhi nga angay protektahan ug ipalambo.
Aron atong mapahunong ang pagkalat sa "culture of violence" nga makapawala sa pagkabililhon sa tawo, tudluoan nato ang mga miyembro sa pamilya makakat-on sa pagpuyo nga anaa ang hustisya, integridad ug paglaum nga maoy moalim sa atong galamhan.
Kon ikaw Kristiyano, usa ra ang atong pagtoo nga ang kinabuhi sa tawo maoy bugtong gasa nga gihatag sa Ginoo alang kanato. Nga ang matag usa kanato gihulma sa Ginoo sumala sa iyang dagway ug kasamahan. Busa, ikaw ug ako gilingkawas na sa atong Savior nga si Hesukristo.
Ang kuwaresma maoy panahon nga kita magpinasayloay. Gitawag kita sa tinuod nga pagpamalandong, pag-ampo ug paglihok alang sa pagpalambo sa "culture of life" ug pagsaway, pagpugong batok sa "culture of death ug violence".
Mao ni ang dagkung rason nganong ang "ethic, culture of life" manginlabot man ug supak sa mga kalihukan sa aborsiyon, euthanasia, human trafficking, summary killings, ug death penalty.
Tungod kay ang Ginoo lamang ang tuburan sa kinabuhi, dili nato makaya ug tigpakaaron-ingnon nga ikaw ug ako mga ginoo sab ta.
Balikan nato kon unsa ka importante ang kinabuhi sa matag tawo, bata ka man ug tigulang, masakiton ka man ug amang, bakol, angay gyud ampingan ug protektahan tungod kay ikaw ug ako "may kinabuhi".
Wagtangon ta ang mga kasuko ug kaligutgot, hulipan nato sa paglaum, kalipay ug pagkamapasalamaton. Amen. (Feedback -09487549768)