KARONG adlawa, mobalik sa pagkapulis ang nasuspenso ug ni-resign nga PNP Chief nga si Alan Purisima. Ang tigpamaba sa PNP nga si Senior Superintendent Bartolome Tobias niingon nga ang pag­kabalik ni Purisima sa serbesyo nagtimaan nga mahibalik usab ang iyang mga benepisyo sa pagkaopisyal sa kapolisan.

Makadawat pag-usab si Pu­risima sa binuwan nga suweldo nga P117,000 ug ang iyang subsistence allowances ug uban pang mga benepisyo hangtod sa iyang pagretiro Nobiyembre 21.

Disyembre 4 sa miaging tuig, ang Ombodsman misuspenso kang Purisima ug unom ka bowan tu­ngod sa anomalosong kontrata sa courier service nga Werfast Documentary Agency niadtong tuig 2011 alang sa delivery sa license cards sa mga armas. Si Purisima ug ang ubang mga opisyal sa kapolisan mikuha sa serbesyo sa Werfast bisan ug walay accreditation sa PNP.

Si Purisima nag-atubang usab ug duha ka mga kasong plunder sa Ombodsman. Gikuwestyon ang giingong mga tinaguan niyang bahandi, ang resthouse niya sa San Leonardo, Nueva Ecija ug ang gikatahong bongga nga white house sa Kampo Krame. Ang pinakasipa niyang kontrobersiya nga bisan suspendido, siya apil sa mimando sa operation sa PNP Special Action Force sa Mamasapano nga nakapatay ug 44 ka mga polis.

Human sa pagkasuspenso ug pag-resign ni Purisima, wala pa nakatudlo si Presidente Noynoy Aquino ug permanente nga hepe sa PNP. Si Heneral Leonardo Espina nga gihulagway nga ligdong nga pagkapolis nagpabilin nga officer-in-charge sa PNP.

Sa han-ay sa mga polis, sila nagtuo nga kinahanglan nga mobutang si PNoy ug permanenteng hepe alang sa hugot nga liderato sa kapolisan.

Apan daw wala lamii si PNoy kang Espina. Moretiro na lang si Espina sa sunod bowan, ang iyang estado sa pangatungdanan mao lang ang OIC. Wala kakita si PNoy sa pagkamahinungdanon nga dunay permanenteng hepe sa kapolisan. Mas urgent pa niya ang Bangsamoro Basic Law (BBL) nga iyang gipaninguha nga mapasar sa dili pa matapos ang iyang termino.

Mitumaw karon ang mga pangalan nga posibleng itudlo ni PNoy nga permanenteng hepe sa kapolisan. Kini naglakip nila ni Heneral Marcelo Garbo ang kanhi hepe sa kapolisan sa Central Visayas ug si Heneral Raul Petrasanta, ang kanhi hepe sa PNP Firearms and Explosives Office (FEO).

Sa duha, mas sipa ang pangalan ni Petrsanta nga maoy pilion ni PNoy nga mangulo sa kapolisan. Si Petrasanta ang gikataho nga mas suod ni Purisima. Mahimong malukmay dayon si PNoy kon irekomendar ni Purisima si Petrasanta.

Ang problema kay si Petrasanta, apil sa 19 ka mga polis nga gisuspenso sa Ombudsman ug unom ka bowan niadtong Disyembre sa miaging tuig gumikan sa pagpamaligya ug mga mga armas ngadto sa mga rebeldeng komunista.