Lariosa: Pabilo sa gubat

DAKONG tilimad-on kining pagpangilog sa China sa mga isla diha sa West Philippines Sea. Mibadlong na ang Estados Unidos sa America (USA) sa China. Apan mitu­bag kini nga di angay manghilabot ang America.

May mga dagkong katarungan nganong manghi­labot ang America. Supak sa International Law kining ilang gibuhat pagpangilog sa mga isla nga ato. Makagdan ang interes sa America (negusiyo ug impluwensiya) sa South East Asia. Di kini makatalikod sa Pilipinas.

Sa uwahing kalambuan, may kasabutan nga giuyonan nilang PNoy ug sa kagamhanan sa Japan nga moanhi ang Japanese military forces alang sa usa ka joint military exercises nga himuon sa labing mada­ling panahon.

Kini epekto sa State Visit ni PNoy sa Japan sa miaging semana. Nagkinahanglan pa sa pag-aprobar sa senado nga positibong mahitabo tungod kay alalay ni PNoy ang kadaghanan sa mga senador.

Natukmod ang kasabutan sa nahitabong pagpangilog karon sa China. Kini pagpakita sa China nga ang Japan dapig sa Pilipinas. Bisan unsang orasa naa ang Japan nga motabang pagpanalipod nato uban sa America. Gitaho nga naa say isla sa Japan nga buot angkunon sa China.

Unsaon ang Pilipinas kuwang mag modernong armas iggugubat. Matila lang dayon ta sa mga dagkong nasod nga moderno ang mga armas ug fighter planes sama sa China. Wa man gani tay barkong iggugubat. Naa hinuon tay karaang patrol boats ug kagangkagang nga mga abyon.

Epekto ni sa mga pangurakot diha sa military. Mga binilyon nga budget sa armadong kusog alang unta sa arm modernization nasud lang sa bulsa sa mga Heneral. Mamalit man tuod og tag-as nga armas apan ipamaligya lang sa mga rebelde.

Nahinumdom mo ni Kalihim Angelo Reyes (kanhi AFP chief) nga naghikog dihang giimbestigar? Si Heneral Garcia (financial comptroller) nabilanggo sa pangurakot, apan nakagawas dihang giuli ang minilyon nga salapi.

Tumoy lang kini sa iceberg kay ang ubang dagkong pangurakot naa pa seguro sa ilawom nga wa pa masuhid. Kini ang hinungdan kuno nganong natukod ang Reform Arm Movement (RAM) ni Honasan.

Kadto sang Oakwood Mutiny ni Trillanes ang tuyo pag-usab sa military nga naputos sa pangurakot. Tu­ngod sa ilang kawsa napili sila si Gregorio Honasan ug Antonio Trillanes nga senador.

Apan di ta mabalaka kon ang pabilo mopaulbog gubat sa kalibutan kay naa may America ug ubang dagkong nasod nga mga kaalyado. Ang nakakuyaw lang kay una tang masugnod isip dangilag.

Kining lindog naglaom nga hinayhinayng mahilis ang pabilo kay makamatngon ang China nga ang ilang gihimo supak sa lagda sa katarong nga makaungkag lamang sa kalinaw sa kalibutan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph