NAGBANSIWAG kagahapon ang balita nga ang Malacanang di uyon sa gisugyot nga Charter change (Cha-cha) ni retired Chief Justice Reynato Puno aron hatagan og dalan ang Bangsamoro region.
Ang unod sa balita, "The President reminded the negotiators in the drafting of the Bangsamoro Basic Law (BBL) that everything should be done within the flexibilities of the Constitution," suma ni presidential spokesman Edwin Lacierda.
Gidugang pa niya, "We strongly believe that the BBL was drafted within those flexibilities and it is, therefore, to our mind, constitutional. Certainly, people will be asking or may question it but we are very firm in our belief that we can defend (it) in whatever forum."
Kini ang pahayag sa Malaca¤ang labot sa pahayag ni Chief Justice Puno nga miduso sa Constitutional Convention (Concon) alang sa kausaban sa Constitution.
Ang BBL, sa kasamtangan nga draft form, mahimong ma-implementar pinaagi sa federal-parliamentary nga porma sa gobyerno nga nagkinahanglan og Charter change, suma sa Chief Justice, kinsa milunsad sa iyang movement nga gitawag "Bagong System, Bagong Pag-asa."
Dugang sa kanhi Chief Justice nga ang mga miyembro sa Concon mahimong pilion atol sa 2016 elections.
Ang Malacanang, sa laing bahin, padayon nga nag-awhag sa kongreso aron aprubahan ang BBL, nga produkto sa halapad nga konsultasyon sa Mindanao.
Apan ang akong pangutana: Nganong daghan man nga taga Mindanao ang di pabor sa BBL? Kon ilang gipatuman ang halapad nga konsultasyon, nganong daghang political leaders sa Mindanao ang misupak niini?
Tingali, duna silay imbitasyon sa mga stakeholders kaniadto, apan wa lang mitambong sa konsultasyon mao nga ning uwahi lang, misupak na sila?
Sa tanang balaudnon nga buot himuong balaod ni Pangulong Benigno Aquino III, di gyud malikayan nga dunay presyur nga himuon ang Malaca¤ang sa mga kongresista, usa na dinhi ang BBL.
Aw, di naman kinahanglan ang presyur kay majority kanila, sakop man sa ruling party sa pangulo - naturalmente - mopabor gyud kung unsa ang gusto ni Mr. President.
Dinhi nako nakita sa political system sa Pilipinas ang pagpanghilabot sa executive department sa trabaho sa legislative department.
Mao ni nga makaingon ko nga di gyud ma-apply ang giingon nga dunay independenteng gahum ang matag sangang departamento sa gobyerno, nga ang mga magbabalaod di basta-basta nga magawngan sa hepe ehekutibo.
Sa nahitabo karon sa BBL, nanghinaut ko nga moboto ang mga magbabalaod subay sa ilang konsensya, di kay tungod sa ilang personal nga tinguha.