SIERRA BULLONES, Bohol - Dead on arrival ang usa ka 30 anyos nga ulitawo human kini maatrasi ug naguyod ilawom sa usa ka Canter nga sakyanan dihang padung na kining mo-parking sa daplin nga bahin sa karsada niadtong Hunyo 7 sa gabii didto sa highway sa Purok 3, Barangay Salvador, Sierra Bullones, Bohol.

Giila ang biktima nga si Frederic Oscar, kinsa residente ra usab sa nahisgutang lugar.

Ang drayber sa sakyanan nga naka-atras sa biktima mao si Ricardo Bungabong, 53, negosyante nga pamilyado ug residente sa Purok 1, Barangay Salvador, Sierra Bullones, Bohol.

Sa pasiunang pakisusi sa kapulisan, wa nakabanatay ang drayber sa Canter sa presensiya sa biktima tungod kay way headlight ang motor sa biktima.

Naguyod pag-ayo ang motor sa biktima ilawom sa sak­yanan hinungdan nga nakaangkon kinig mga samad sa ulohan ug lawas nga bahin niini.

Gidala gilayon ang biktima sa Carmen District hospital sa lungsod sa Carmen apan kideklarar dead on arrival ang biktima sa doktor nga maoy nag-atiman niini.

Boluntaryo usab nga mitahan ang drayber sa Canter sa iyang kaugalingon ngadto sa kapulisan alang sa pag-atubang sa kasong posibling ipasaka sa mga kabanay sa biktima.