GENERAL SANTOS CITY -- Tingkagol karon sulod sa selda sa Malapatan Police Station ang usa ka miyembro sa Civil Security Unit (CSU) human nalambigit sa gidiling druga.

Giila sa kapulisan ang suspek nga si Chris Antonio, 54, molupyo sa Barangay Sapu, Malapatan, Sarangani Province.

Subay sa imbestigasyon, nasakuti ang suspek human makadawat og taho ang kapulisan sa Malapayan kabahin presensiya sa suspek ug gihimo gilayon ang operasyon.

Sa gilusad nga drug bust, sa pagpanguna ni Police Senior Inspector Ernesto Salandron, chief of police sa Malapatan, hagbong sa laang ang suspek human gidawat niini ang marked money nga mokabat sa P300.

Nakuha sa mga kapulisan gikan sa posisyon sa suspek ang tulo ka sachet sa gituohang shabu nga mokabat sa P1,300, usa ka kalibre .45 nga pistola, mga bala ug drug paraphernalia.

Matud pa ni Salandron nga dugay na nilang gipanid-an ang suspek apan niadtong Dominggo lamang sa buntag nila nasakpan si Antonio.

"Dugay na namo na gina-surveillance siya, Sir, kay dugay na pod mi kadawat og sumbong nga involve na siya sa drug trade, pero kaso lang kay idlas," matud ni Salandron.

Kasong paglapas sa Republic Act 9165, kun Comprehensive Dangerous Drugs Act of 2002, ang pagaatubangon sa suspek sa hukmanan. (Emir C. Bariquit)