ANG Philippine Drug Enforcement Agency (PDEA)-Davao miduso na sa kaso ngadto sa Tagum City Prosecutor's Office batok sa duha ka mga big-time drug dealers sa rehiyon kinsa nasikop sa drug bust niadtong Hunyo 5 sa Barangay Magugpo West, Tagum City.
Suma ni PDEA-Davao information officer Noli Nephi Dimaandal nga ang gidemanda mao sila Oder Saipuding ug Ferdinand Tan Camacho.
Silang duha gikiha sa paglapas sa sections 12 (Possession of Equipment), 15 (Use of Dangerous Drugs), ug 26 (Attempt or Conspiracy) may relasyon sa section 5 (Sale) or Republic Act 9165 kun Comprehensive Dangerous Drugs Act of 2002.
Sila Saipuding ug Camacho giposasan human ang mga otoridad nakasakmit nila og usa ka kilong shabu nga nagkantidad og P9 million.
Si Dimaandal nagsulti nga mga suspek gikonsidera nga "key players" sa negusyo sa druga sa rehiyon.
Mga suspek gikatahong giaresto human si Saipuding mitunol sa druga ngadto sa pulis nga nagtakuban nga buyer og shabu. (Kriztja Marae G. Labrador)