ORMOC CITY- “Ormoc City is still safe,” kini maoy giingon ni Bise Mayor Leo Carmelo Locsin Jr. taliwala sa mga nahitabong pagpamusil ning dakbayan niadtong milabayng semana.

Matod sa bise mayor nga base sa impormasyon nga iyang nakuha gikan sa kapulisan, pulos lang personal nga kasuko ang hinungdan sa mga krimen.

Gitumbok sa bise mayor ang nahitabong pagpusil patay sa 27 anyos nga si Albert Christian sa Lilia Ave., Barangay Cogon; pagpamusil sa mag-live in nga si Claudio Borikoy ug Janice Tampos sa Bay View Inn ug ingon man sa pagpusil patay kang Eliezar Ybañez sa Barangay Hibunaon.

Dugang niya nga duna gihapoy dapat i-improve nga stratehiya sa pagbantay sa dakbayan ilabi na ang pagsud gawas sa ‘criminals riding in tandem’ sama nalang sa pagbutang og ‘police outpost’, checkpoint ug Closed Circuit Television (CCTV) camera sa kadalanan.

“Ato lang tagaan og oras ug panahon ang atong bag-ong city director sa PNP diri sa Ormoc kay kini si SSupt. Ferdinand Garay daghan nig maayong plano sa Ormoc,” matod ni Locsin.

Gisaad sa bise mayor nga andam sila nga mosuporta sa mga hangyo sa kapulisan ug ingon man sa executive department.

“Kami sa Sanggunian, 100 percent mi nga mo-support sa ato kapulisan. Gani nagkaestorya mi ni Col. Garay nga maghuwat lang mi og unsa ilang request just to enhance sa ila function and to be more efficient” dugang ni Locsin.