DAVAO DEL NORTE -- Upat ka piniriso sa Tagum City Police Station ang naka-eskapo sa alas 2:50 sa kaadlawon kagahapon, Hunyo 9.

Mga nakaeskapo mao sila Ram John Gudin, hamtong ang pangedaron ug dunay kasong illegal possession of firearms; Jasper Salas, hamtong ang pangedaron ug dunay kasong illegal possession of ammunitions; ug sila John Dela Peña ug Rolby Suelto, mga menor-de-edad nga parehong dunay kasong kawat.

Sumala pa nga nakahimo ang upat sa pag-eskapo atol sa pagbunok sa ulan kagahapon sa kaadlawon pinaagi sa paggabas sa kadena sa pultahan sa ilang selda.

Mga pugante miagi mismo sa gate sa police station, likod lamang sa Tagum City Hall.

"Iniimbestigahan pa po natin ang pangyayari. Wala pa pong result ang investigation. Lahat ng personnel dunay pinatawag natin at inimbestiga," reaksiyon ni Tagum City Police Station commander Superintendent Solomon de Castilla.

Nagdumili sab ang hepe nga mohatag og komento sa akusasyong natulog ang iyang kapulisan, hinungdan nga nakaeskapo ang mga piniriso.

Nasayran nga duna pay lima ka mga piniriso ang nahibilin sulod selda, apil na si PO2 Domijun Valleser, kinsa gisikop tungod sa kasong obstruction of justice dihang wala dayon ma-intrigo ang nakuhang ebidensiya atol sa drug operation niadtong milabay nga Abril.

Sa nakuhang impormasyon sa SuperBalita, nasayran nga si Valleser na mismo ang mipukaw sa naka-duty nga pulis.

"Nakamata na lang pod mi, Ma'am, kay saba man; sige og tawag si Sir Valleser sa naka-duty nga guard. Iyang gipukaw kay lagi abri na ang sira sa prisohan," sulti sa dili magpailang priso.

Wala mohatag og pamahayag si Valleser sa panghitabo tungod kay di siya gustong maapil ug maipit sa hitabo.

Nasayran nga wala nanguyog ang nabiling mga priso tungod kay gawas nga wala sila maapil sa plano sa pagpuga, dili usab nila gusto nga madugangan ang ilang mga kaso.

Sa pagsuwat ning balita kagahapon, padayon ang pagpangita sa kapulisan sa mga pugante.

Sa pakighinabi kang Davao del Norte Provincial Police Director Samuel Gadingan, gikumpirma niini nga kasong administratibo ang ipasaka sa mga pulis kon mapamatud-ang nagpasagad sa pag-eskapo sa mga priso.